ఏపీ ప్రభుత్వానికి మరోసారి షాక్.. హైకోర్టు కీలక ఆదేశాలు

ఏపీలో పంచాయతీ భవనాలకు వైఎస్సార్ కాంగ్రెస్ పార్టీ రంగులు వెంటనే తొలగించాలని రాష్ట్ర హైకోర్టు ఆదేశించింది. స్థానిక సంస్థల ఎన్నికల నిర్వహణలోపు ఈ ప్రక్రియను పూర్తి చేయాలని ఆదేశించింది. అయితే రంగులు తొలగించేందుకు రాష్ట్ర ప్రభుత్వం మూడు వారాల గడువు ఇవ్వాలని కోరింది. ఈ మేరకు హైకోర్టు దీనికి అంగీకరించి గడువిచ్చింది.

కాగా, సీఎం వైఎస్ జగన్ నేతృత్వంలోని వైసీపీ అధికారంలోకి వచ్చిన తర్వాత ప్రభుత్వ కార్యాలయాలకు ఆ పార్టీ జెండా పోలిన రంగులు వేస్తున్నట్లు ఆరోపణలు వచ్చాయి.ఈ విషయంపై పలువురు హైకోర్టులో పిటిషన్లు దాఖలు చేశారు. దీనిపై విచారణ జరిపిన హైకోర్టు కచ్చితంగా రంగులు తొలగించాలని ఆదేశించింది.

ప్రభుత్వ, పంచాయతీ కార్యాలయలకు ఏ పార్టీతో సంబంధం లేని రంగులేయాలని హైకోర్టు ఇదివరకే తీర్పు ఇచ్చిన సంగతి తెలిసిందే. అయితే మరికొంత సమయం కావాలని ప్రభుత్వం హైకోర్టులో అనుబంధ పిటిషన్‌ దాఖలు చేసింది. దీనిపై హైకోర్ట్ తాజాగా విచారించింది. రంగులు తొలగించేందుకు ప్రభుత్వానికి మూడు వారాల గడువిచ్చింది.