TTD: టీటీడీకి ఆర్ఎస్ బ్రదర్స్ రూ. 3.70కోట్ల విరాళం

TTD: హైదరాబాద్ కుచెందిన ప్రముఖ వ్యాపార సంస్థ ఆర్ఎస్ బ్రదర్స్ టీటీడీలోని పలు ట్రస్టులకు రూ. 3.70కోట్ల భారీ విరాళాన్ని అందించింది. సంస్థలు ఎండీ రాజమౌళి, పొట్టి వెంటకేశ్వర్లు, ప్రసాదరావు, మాలతి లక్ష్మీ కుమారిలు బుధవారం శ్రీవారిని దర్శించుకున్న అనంతరం ఈ విరాళాన్ని అందించారు.

రంగనాయకుల మండపంలో టీటీడీ అదనపు ఈవో సీహెచ్ వెంకయ్య చౌదరికి విరాళం చెక్కును అందించారు. టీటీడీ ట్రస్టుల ద్వారా హిందూ ధర్మ పరిరక్షణ, విద్య, వైద్యానికి చేస్తున్న సేవలకు చేయూతగా విరాళాన్ని అందించినట్లు దాతలు వెల్లడించారు.

తిరుపతి శ్రీ గోవిందరాజస్వామివారి ఆలయంలో సెప్టెంబర్ నెలలో పలు విశేష ఉత్సవాలు జరగనున్న సంగతి తెలిసిందే. సెప్టెంబర్ 6, 20,27 తేదీల్లో శుక్రవారాల్లో సాయంత్రం 6గంటల నుంచి శ్రీ ఆండాళ్ అమ్మవారిని ఆలయ నాలుగు మాడవీధుల్లో ఊరేగింపు నిర్వహిస్తారు. సెప్టెంబర్ 4వ తేదీ ఉత్తర నక్షత్రం సందర్భంగా సాయంత్రం 6గంటలకు ఉభయనాంచారులతో కలిసి శ్రీ గోవిందరాజస్వామివారు భక్తులకు దర్శనం ఇస్తారు.

సెప్టెంబర్ 13న శ్రీ గోవింద రాజస్వామివారి ఆలయంలో పవిత్రోత్సవాలకు అంకురార్పణ చేస్తారు. సెప్టెంబర్ 14 నుంచి 16వ తేదీ వరకు పత్రోత్సవాలకు, సెప్టెంబర్ 18న శ్రీ గోవింద రాజస్వామివారి గరుడ సేవ ఉంటుంది. సెప్టెంబర్ 23న రోహిణి నక్షత్రం సందర్బంగా సాయంత్రం 6గంటలకు రుక్మిణి, సత్యభామ సమేత శ్రీపార్థసారథస్వామివారు మాడ వీధుల్లో ఉరేగి భక్తులకు కటాక్షలు అందిస్తారు.