Chandrababu Visits Escientia Victims: బాధితులను పరామర్శించిన సీఎం చంద్రబాబు ఏమన్నారంటే..

Chandrababu Naidu Visits Escientia Company Reactor Victims: అనకాపల్లి జిల్లా ఎసెన్షియా ఫార్మా కంపెనీలో రియాక్టర్ పేలుడు బాధితులను సీఎం చంద్రబాబు నాయుడు పరామర్శించారు. ఈ ప్రమాదంలో 17 మంది ప్రాణాలు కోల్పోగా ప్రస్తుతం మరో 35 మంది చికిత్స పొందుతున్నారు. వారిలోనూ కొంత మంది పరిస్థితి విషమంగా ఉన్నట్లు సమాచారం అందుతోంది. ఈ నేపథ్యంలోనే ఈ ప్రమాదంలో తీవ్రంగా గాయపడి విశాఖపట్నంలోని మెడికవర్ ఆస్పత్రిలో చికిత్స పొందుతున్న క్షతగాత్రులను సీఎం చంద్రబాబు పరామర్శించారు.క్షతగాత్రులను ఒక్కొక్కరి దగ్గరికి వెళ్తూ వారి పరిస్థితిని అక్కడే ఉన్న వైద్యులను నేరుగా అడిగి తెలుసుకున్నారు.

ఆస్పత్రిలోని అన్ని వార్డులను కలియతిరుగుతూ బాధితులకు ధైర్యం చెప్పారు. అలాగే బాధితుల కుటుంబసభ్యులతోనూ సీఎం చంద్రబాబు మాట్లాడి వారికి కూడా మనోస్థైర్యం కల్పించారు. బాధితుల కుటుంబాలకు ప్రభుత్వం అండగా ఉంటుంది అని సీఎం చంద్రబాబు భరోసా ఇచ్చారు. సీఎం చంద్రబాబు నాయుడు వెంట గంటా శ్రీనివాస్ రావు కూడా ఉన్నారు.

బాధిత కుటుంబాలతో మాట్లాడిన సీఎం చంద్రబాబు నాయుడు.. మీరు ధైర్యంగా ఉండి క్షతగాత్రులకు ధైర్యం చెప్పండి అని అన్నారు. తీవ్రంగా గాయపడిన వారికి రూ. 50 లక్షలు, మాములుగా దెబ్బలు తగిలిన వారికి రూ. 25 లక్షలు నష్టపరిహారం ఇప్పిస్తాం. మీకు ప్రభుత్వం అండగా ఉంటుంది అని సీఎం చంద్రబాబు భరోసా ఇచ్చారు.