Shamirpet: చెరువులో పడి ఇద్దరు డాక్టర్లు మృతి.. సెల్ఫీనే కారణమా?

Shamirpet: మేడ్చల్‌ జిల్లా శామీర్ పేట్ పోలీస్ స్టేషన్ పరిధిలో విషాద ఘటన చోటు చేసుకుంది. అల్వాల్‎లోని ఎక్సల్ హాస్పిటల్‎లో అన్నదమ్ములు గౌతమ్, నందన్ డాక్టర్లుగా విధులు నిర్వహిస్తున్నారు. వీరు వారణాసి నుంచి వచ్చి హైదరాబాద్‎లో హోమియోపతి ఆస్పత్రి పెట్టి నగరంలో స్థిరపడ్డారు. అయితే ఆదివారం సరదాగా గడిపేందుకు ఇద్దరు అన్నదమ్ములు శామీర్‎పేట చెరువు వద్దకు వచ్చారు. చెరువు సమీపంలో సెల్ఫీ ఫోటోలు తీసుకుంటున్న సమయంలో ప్రమాదవశాత్తు కాలు జారీ చెరువులో ఒకరు పడిపోయారు.

వెంటనే సోదరుడిని కాపాడేందుకు మరో సోదరుడు వెళ్లగా ఇద్దరు చెరువులోనే ముగిపోయారు. ఈ క్రమంలో చెరువు లోతుగా ఉండటంతో..ఇద్దరికి ఈత రాకపోవడంతో చెరువులో గల్లంతయ్యారు. సమాచారం అందుకున్న పోలీసులు ఘటనా స్థలానికి చేరుకుని పరిశీలించారు. అనంతరం గజ ఈతగాళ్ల సహాయంతో మృతదేహాల కోసం గాలింపు చర్యలు చేపట్టారు. మృతులు వారణాసికి చెందిన వారుగా పోలీసులు గుర్తించారు.