కెమెరాల సాక్షిగా దిల్లీలో ఆఫ్గాన్ జాతీయుడిపై కాల్పులు, మృతి

నాదిర్ షా అనే ఆఫ్గాన్ జాతీయుడిపై గురువారం రాత్రి న్యూదిల్లీలో ఇద్దరు గుర్తు తెలియని వ్యక్తులు కాల్పులకు దిగారు. ఈ ఘటనలో తీవ్రంగా గాయపడిన ఆయన ఆసుపత్రిలో చికిత్స పొందుతూ మరణించారు. ఈ ఘటనకు సంబంధించి స్థానిక పోలీసులకు రాత్రి 10:45 గంటలకు సమాచారం వచ్చిందని దిల్లీ సౌత్ డీసీపీ అంకిత్ చౌహాన్ చెప్పారు. గ్రేటర్ కైలాష్ ప్రాంతంలో ఈ ఘటన జరిగింది. నిందితులు ఏడు నుంచి 8 రౌండ్లు కాల్పులు జరిపారని ఆయన తెలిపారు. నిందితులు ఇద్దరు బైక్ పై పారిపోయారని వారి కోసం గాలింపు చర్యలు చేపట్టామన్నారు.ఈ ఘటనకు సంబంధించి స్థానికంగా ఉన్న సీసీటీవీల్లో రికార్డయ్యాయి.

లారెన్స్ బిష్ణోయ్ గ్యాంగ్ పనేనా?

దిల్లీలో జిమ్ ను నాదిర్ షా నడుపుతున్నారు. అంతేకాదు ఆయనకు దుబాయ్ లో పలు వ్యాపారాలు కూడా ఉన్నాయి. అతనిపై కొన్ని క్రిమినల్ కేసులున్నాయి. నాదిర్ షా హత్యకు లారెన్స్ బిష్ణోయ్ గ్యాంగ్ కు చెందిన గోల్డీ బ్రార్ సన్నిహితుడు రోహిత్ గోదారా సోషల్ మీడియాలో పెట్టిన పోస్టు చర్చకు దారితీసింది. తన సన్నిహితుడు సమీర్ బాబా వ్యాపార ఒప్పందాలను అడ్డుకోవడంతో నాదిర్ షాను అంతమొందించాలని ప్లాన్ చేసినట్టుగా రోహిత్ గోదారా చెప్పారు. ఈ పోస్టుపై పోలీసులు దర్యాప్తు చేస్తున్నారు.