Prostitution Racket: లాడ్జిలో వ్యభిచారం, గంజాయి.. పోలీసుల సోదాలతో వెలుగులోకి
సుమారు 400 మంది పోలీసులు 80 బృందాలుగా విడిపోయి విశాఖ నగరవ్యాప్తంగా ఏకకాలంలో ఈ తనిఖీలు చేపట్టారు. ఇదే తనిఖీల్లో ఇంకొన్ని ఇతర లాడ్జిల్లో గంజాయి సైతం పట్టుబడినట్టు తెలుస్తోంది.
Prostitution Racket Busted in Vizag: విశాఖపట్నంలో శుక్రవారం రాత్రి నగరవ్యాప్తంగా తనిఖీలు చేపట్టిన పోలీసులు అందులో భాగంగానే లాడ్జీల్లో సోదాలు నిర్వహించారు. పోలీసుల సోదాల్లో లాడ్జీల్లో వ్యభిచారం వ్యవహారం బయటపడింది. ఈ ఘటనలో ముగ్గురు మహిళలతో పాటు లాడ్జి నిర్వాహకుడిని పోలీసులు అదుపులోకి తీసుకున్నారు. మొత్తం 12 లాడ్జీల్లో సోదాలు జరిపినట్టు తెలుస్తోంది. అనేక లాడ్జిలు పూర్తిగా నిభందనలకు విరుద్ధంగా నిర్వహిస్తున్నట్టు పోలీసులు గుర్తించారు. లాడ్జిల్లో భద్రత ప్రమాణాలు పాటించడం లేదని, కనీసం సీసీటీవీలు కూడా సరిగ్గా మెయింటెన్ చేయడం లేదని తెలిసింది. అంతేకాకుండా లాడ్జికి వచ్చిపోయే విజిటర్స్ వివరాలు సైతం నమోదు చేసుకోవడం లేదని చెబుతున్నారు. సుమారు 400 మంది పోలీసులు 80 బృందాలుగా విడిపోయి విశాఖ నగరవ్యాప్తంగా ఏకకాలంలో ఈ తనిఖీలు చేపట్టారు.
లాడ్జిల్లోనే గంజాయి నిల్వలు
ఇదే తనిఖీల్లో ఇంకొన్ని ఇతర లాడ్జిల్లో గంజాయి సైతం పట్టుబడినట్టు తెలుస్తోంది. విశాఖ పరిసర ప్రాంతాల నుంచి భారీ ఎత్తున గంజాయి రవాణా జరుగుతూ అనేక సందర్భాల్లో పట్టుబడిన సంగతి తెలిసిందే. ఈ నేపథ్యంలోనే తాజాగా లాడ్జిల్లో గంజాయి పట్టుబడటంతో పోలీసుల కంటపడకుండా లాడ్జిల్లో నిల్వ చేసి అక్కడి నుండే నగరం నలుమూలలా సరఫరా చేస్తున్నారా అనే అనుమానాలు వ్యక్తమవుతున్నాయి.