YSRCP MLC Anantha Babu Video: ఎమ్మెల్సీ అనంత బాబు వీడియో వైరల్.. బాబు హనీట్రాప్‌లో పడ్డారా ?
YSRCP MLC Anantha Babu Viral Video: వైఎస్ఆర్ కాంగ్రెస్ పార్టీ ఎమ్మెల్సీ దువ్వాడ శ్రీనివాస్ వివాహేతర సంబంధం పెట్టుకున్నారంటూ వైరల్ అయిన వ్యవహారం ఇంకా మరువక ముందే తాజాగా అదే పార్టీకి చెందిన మరో ఎమ్మెల్సీ అనంత బాబు ముద్దుల వ్యవహారం వెలుగులోకొచ్చింది. ఎమ్మెల్సీ అనంత బాబు అనగానే ఈపాటికే గుర్తొచ్చి ఉంటుంది.. ఔను, రెండేళ్ల క్రితం తన వద్ద పనిచేస్తోన్న సుబ్రహ్మణ్యం అనే కారు డ్రైవర్ ని హత్య చేసినట్లుగా ఆరోపణలు ఎదుర్కుంటూ అప్పట్లోనే హెడ్ లైన్స్ లో నిలిచారు.
తాజాగా అనంతబాబుకి సంబంధించి ఓ వీడియో సోషల్ మీడియాలో వైరల్ అవుతోంది. అనంత బాబు ఆ వీడియోలో అవతలి వ్యక్తికి అసభ్యకరంగా ముద్దులతో సైగలు చేస్తున్నట్లుగా ఉంది. అంతేకాకుండా చెప్పలేని అంశాలు కూడా ఈ వీడియోలో ఇంకొన్ని ఉన్నాయి. అనంత బాబు వీడియో వైరల్ అవడంతో వైఎస్ఆర్ కాంగ్రెస్ పార్టీ మరోసారి ఇరకాటంలో పడినట్లయింది.
అయితే ఈ వివాదంపై స్పందించిన అనంత బాబు.. ఆ వీడియో తనది కాదని, తాను చిన్న పిల్లలకు ముద్దులు పెట్టిన వీడియోను కట్ చేసి, వాటితో మార్ఫింగ్ చేసి ఎవరో తనని బ్లాక్ మెయిల్ చేస్తున్నారు అని వివరణ ఇచ్చారు. తెలంగాణ నుండి ఎవరో గత 6 నెలలుగా తనను ఈ మార్ఫింగ్ వీడియోతో బ్లాక్ మెయిల్ చేస్తున్నారు అని అనంతబాబు ఆరోపిస్తున్నారు. డబ్బులు ఇవ్వకపోతే ఆ వీడియోను లీక్ చేస్తాం అని వాళ్లు తనని బెదిరిస్తున్నారు అని అనంత బాబు చెబుతున్నారు.
ఇదే విషయమై అనంత బాబు అల్లూరి సీతారామ రాజు జిల్లా అడ్డతీగల పోలీసు స్టేషన్‌లో ఫిర్యాదు చేశారు. తనని బ్లాక్ మెయిల్ చేస్తున్న వారిపై చట్టరీత్యా చర్యలు తీసుకోవాల్సిందిగా అనంత బాబు ఆ ఫిర్యాదులో పోలీసులకు విజ్ఞప్తి చేశారు. అయితే, ఈ వీడియో చూసిన జనం మాత్రం ఇది హనీ ట్రాప్ అయి ఉండొచ్చు అని చర్చించుకుంటున్నారు. గతంలో కోడుమూరు మాజీ ఎమ్మెల్యే సుధాకర్ బాబు, అవంతీ శ్రీనివాస్, గోరంట్ల మాధవ్, మాజీ మంత్రి అంబటి రాంబాబు.. ఇలా తరచుగా ఒక్కొక్కరి పేర్లు ఇలాంటి వార్తల్లో రావడం ఎప్పటికప్పుడు పబ్లిక్ టాక్ అవుతోంది.