TG Govt Help Flood Victims: వరద బాధితులకు భారీ ఊరట. రూ. 16,500లతోపాటు ఇందిరమ్మ ఇల్లు

TG Govt help Flood Victims: తెలుగు రాష్ట్రాల్లో వారం రోజులుగా కురుస్తున్న భారీ వర్షాలకు ఎన్నో కుటుంబాలు రోడ్డు పడ్డాయి. ఆస్తి నష్టంతోపాటు ప్రాణ నష్టం కూడా జరిగింది. తీవ్ర వర్షాలకు ఎన్నో కుటుంబాలకు తమ వాళ్లను కోల్పోయాయి. ఈ క్రమంలోనే వారికి అండగా నిలిచింది తెలంగాణ ప్రభుత్వం. ప్రతి కుటుంబానికి రూ. 16,500 చొప్పున సాయం అందించనున్నట్లు తెలిపింది. ఈ సాయం చివరి బాధితుడి వరకూ అందుతుందని రెవెన్యూ, సమాచార, పౌర సంబంధాల శాఖ మంత్రి పొంగులేటి శ్రీనివాస్ రెడ్డి తెలిపారు. వర్షాల వల్ల నష్టపోయామని ఏ ఒక్క కుటుంబం బాధపడాల్సిన అవసరం లేదన్నారు. భారీ వర్షాలపై సోమవారం సచివాలయంలో ఆయన ఉన్నత స్థాయి సమావేశం నిర్వహించారు.

ఈ సందర్భంగా మంత్రి మాట్లాడుతూ.. రాష్ట్రంలో వర్షాలు, వరదలు తీవ్ర నష్టం కలిగించాయి. ఎంతో మంది తీవ్రంగా నష్టపోయారు. దీంతో అన్ని జిల్లాలు వర్షాలు, వరదలు ప్రభావిత ప్రాంతాలుగా ప్రకటిస్తున్నట్లు పేర్కొన్నారు. ఈ వరదల వల్ల జరిగిన నష్టాలను అధికారులు పక్కగా అంచనా వేయాలని ఆదేశించారు. ఒక్కో శాఖ పరిధిలో ఎంత నష్టం జరిగింది..ఎన్ని నిధులు కావాలన్న దానిపై పూర్తి స్థాయిలో నివేదిక రూపొందించి ఇవ్వాలని అధికారులను ఆదేశించారు. ఈ నివేదికలో కేంద్రానికి పంపాల్సిన అంశాలను పొందుపర్చాలని చెప్పారు. వరద ప్రభావిత ప్రాంతాల్లో బాధికులకు యుద్ధ ప్రాతిపదికన ఆర్థిక సాయం అందించాలని మంత్రి సూచించారు.

కాగా ఇప్పటి వరకు రాష్ట్ర వ్యాప్తంగా 33 మంది మరణించినట్లు అధికారులు తెలిపారు. ఆ కుటుంబాలకు రూ. 5లక్షల ఆర్థిక సాయంతోపాటు ఇందిరమ్మ ఇల్లు మంజూరు పత్రాన్ని అందించాలని మంత్రి తెలిపారు. పాక్షికంగా దెబ్బతిన్న ఇళ్లకు ఇందిరమ్మ ఇళ్లు మంజూరు చేయాలని మంత్రి కలెక్టర్లను ఆదేశించారు.