పెళ్లంటే నూరేళ్ల పంట బంధు మిత్రులు, భాజాభజంత్రిలతో అంగరంగ వైభవంగా జరుపుకుంటారు. కాని కరోనా కాలంలో ఎంతటి వారి పెళ్లిళ్లలోనైనా అతిథులే కరువయ్యారు. ఈ సమయంలో ఓ వానరం(కోతి) తానే విశిష్ట అతిథి అయ్యింది. నూతన జంట తలంబ్రాల సందర్భంగా తాను చేయి కలిపి మనసారా ఆశీర్వదించింది. ఈ అరుదైన ఘటన ములుగు జిల్లా మంగపేట మండలంలోని శ్రీ హేమాచల లక్ష్మీ నరసింహ స్వామి వారి సన్నిధిలో జరిగింది.
వాజేడు మండలం గుమ్మడి దొడ్డి గ్రామానికి చెందిన బోదెబోయిన భరత్ కుమార్- నాగమణి వధువరుల వివాహం ఈ ఆలయంలో జరిగింది. ఈ వివాహ వేడుకను ఇరు కుటుంబాల పెద్దలు శుక్రవారం శ్రీ లక్ష్మీ నరసింహ స్వామివారి ఆలయంలో నిరాడంబరంగా కల్యాణం జరిపించారు. అయితే అనూహ్యంగా ఈ పెళ్లి వేడుకలో ఒక వానరం హల్ చల్ చేసింది. అతిథులు అందరితో కూర్చుని మాటా ముచ్చట కలిపిన ఆ వానరం అక్షింతలు పడే సమయంలో అందరిని ఆశ్చర్య పరిచింది. అందరూ ఏం జరిగిందో తేరుకునేలోపే వానరం వధూవరుల తల పైకి ఎక్కి వారిని ఆశీర్వదించి, అక్కడి నుంచి వెళ్లిపోయింది.