BRS: అరికెపూడి వర్సెస్ కౌశిక్ రెడ్డి.. బీఆర్ఎస్ నాయకుల హౌస్ అరెస్ట్

BRS: తెలంగాణలో ఎమ్మెల్యేలు కౌశిక్ రెడ్డి, అరికెపూడి గాంధీ మధ్య తలెత్తిన వివాదంలో ఉద్రిక్తతలు ఇంకా కొనసాగుతున్నాయి. ఇద్దరి మధ్య మాటల యుద్ధం కంటిన్యూ అవుతూనే ఉంది. గొడవలకు కౌశిక్ రేడ్డే కారణమని గాంధీ ఆరోపిస్తుంటే పోలీసులను అడ్డంపెట్టుకొని బీఆర్‌ఎస్ నేతలపై ప్రభుత్వం దాడులు చేస్తోందని బీఆర్‌ఎస్ ఆరోపిస్తోంది. ఈ వివాదం కొనసాగుతుండానే శేరిలింగపల్లిలో గాంధీ ఇంట్లో బీఆర్‌ఎస్ నేతలు సమావేశానికి పిలవడం ఆసక్తిగా మారింది.

ఈ సమావేశానికి కౌశిక్ రెడ్డి కూడా సమాచారం అందింది. ఆయన కూడా సమావేశానికి వెళ్లేందుకు సిద్ధమయ్యారు. సమావేశానికి తరలి వస్తున్న వారిని పోలీసులు అరెస్టు చేశారు. కొందరి హౌస్ అరెస్టు చేశారు. వారితోపాటు బీఆర్‌ఎస్‌లోని కీలకమైన నేతలను కూడా ఇంటి నుంచి బయటకు రానివ్వడం లేదు. హరీష్‌రావును నిర్బంధించారు. మరోవైపు శ్రీనగర్‌ కాలనీలోని ఇంట్లో సబితా ఇంద్రారెడ్డిని, వెస్ట్‌ మారేడ్‌పల్లిలోని నివాసంలో తలసాని శ్రీనివాస్‌ యాదవ్‌ను హౌస్‌ అరెస్టు చేశారు. కూకట్‌పల్లి ఎమ్మెల్యే మాధవరం కృష్ణారావును గృహనిర్బంధం చేశారు. కుత్బుల్లాపూర్‌లో ఎమ్మెల్యే వివేకానంద నివాసం, క్యాంపు ఆఫీసు వద్ద పోలీసులు మోహరించారు.

ఎమ్మెల్సీ శంభీపూర్‌ రాజు ఇంటి నుంచి బీఆర్‌ఎస్‌ నేతలు ర్యాలీగా బయల్దేరాలని నిర్ణయించారు. దీంతో ఆయన నివాసం వద్ద పోలీసులు భారీగా మోహరించారు. అరెకపూడి గాంధీ, కౌశిక్‌రెడ్డి నివాసాల వద్ద కూడా భారీగా బందోబస్తు ఏర్పాటు చేశారు. ఇలా నేతలను నిర్బంధించడంపై బీఆర్‌ఎస్ పార్టీ ఆగ్రహం వ్యక్తం చేస్తోంది. తమపార్టీ నేతలను బయటకు రాకుండా అడ్డుకోవడం ఏంటని ప్రశ్నిస్తున్నారు. కాంగ్రెస్ ప్రభుత్వంలో పోలీసుల రాజ్యం నడుస్తోందని ఆరోపిస్తోంది. అన్నింటినీ ప్రజలు గమనిస్తున్నారని సరైన టైంలో బుద్ధి చెబుతారని చెప్పుకొచ్చింది.