ఇష్టమైతేనే బడికి.. లేకుంటే ఇంట్లోనే

ప్రస్తుతం దేశంలో కరోనా మహమ్మారి విజృంభణ కోనసాగుతూనే ఉంది. అయితే మరణాల రేటు తక్కువగా ఉండటం, రికవరీ రేటు ఎక్కువగా ఉండటంతో దేశవ్యాప్తంగా లాక్ డౌన్ సడలింపులు ఇస్తుందో కేంద్ర ప్రభుత్వం. అన్‌లాక్‌ 4.0లో భాగంగా ఈ నెల 21 నుంచి 9 నుంచి 12 తరగతుల వరకు క్లాసుల నిర్వహించుకునేందుకు కేంద్ర ప్రభుత్వం అనుమతి ఇచ్చింది. ఈ క్రమంలో క్లాసుల నిర్వహణకు కేంద్ర ఆరోగ్య,కుటుంబ సంక్షేమశాఖ మార్గదర్శకాలను కూడా విడుదల చేసింది.

*మార్గదర్శకాల్లో ప్రధానమైన కీలకమైనది.. విద్యార్థులకు వారికి ఇష్టమైతేనే బడికెళ్లొచ్చు.. లేదంటే ఇంట్లోనే ఉంటూ ఆన్‌లైన్‌ క్లాసులు వినొచ్చనే ఆప్షన్‌ ఇచ్చింది. ఇందుకు సంబంధించి తల్లిదండ్రులు/సంరక్షకుల నుంచి రాతపూర్వక లేఖను విద్యార్థులు సమర్పించాల్సి ఉంటుంది.

కేంద్రం జారీచేసిన మార్గదర్శకాలు ఇలా ఉన్నాయి.

*కంటైన్మెంట్‌ జోన్లు లేని స్కూళ్లను మాత్రమే తెరువాలి.

*ప్రతిరోజు తరగతి గదితోపాటు బాత్రూంలు, ఆట స్థలాలు విధిగా శానిటైజ్‌ చేయించాలి.

*ఒకవేళ ఆ స్కూల్‌ను క్వారంటైన్‌ సెంటర్‌గా వాడినట్టయితే దానిని వందశాతం శానిటైజ్‌ చేయాలి. 

*చేతులు శుభ్రం చేసుకోవడానికి విద్యార్థులకు సబ్బులు, శానిటైజర్లను అందుబాటులో ఉంచాలి.

*స్టాఫ్‌గది, కార్యాలయం, మెస్‌, గ్రంథాలయం, కేఫటేరియాల్లో ఖచ్చితంగా భౌతికదూరం పాటించాలి.

*విద్యార్థి,టీచర్‌ మధ్య ఇంటరాక్షన్‌ ఆరుబయట,లేదంటే చెట్లకింద ఏర్పాట్లు చేయాలి.  

*తరగతి గది ఉష్ణోగ్రతలు 24 -30 సెల్సియస్‌ డిగ్రీలుగా, తేమ 40 -70 శాతంగా ఉండాలి.

*తరగతి గదుల్లో గాలి పీల్చుకునేందుకు వీలుగా కిటికీలు, తలుపులు తెరిచి ఉంచాలి.

*నోటుపుస్తకాలు, పెన్నులు,పెన్సిళ్లు, వాటర్‌బాటిళ్లను ఒకరినొకరు మార్చుకోకూడదు.

*ప్రయోగశాలలను సెషన్లుగా విభజించి తక్కువ మంది విద్యార్థులను తీసుకెళ్లాలి.

*ప్రయోగశాలల్లోని పరికరాలను వాడకముందు, వాడిన తర్వాత ఎప్పటికప్పుడు శానిటైజ్‌చేయాలి. 

ఇతర జాగ్రత్తలు

*బస్సుల్లో విద్యార్థులను పాఠశాలలకు లేదంటే వారి ఇళ్లకు తరలించేటప్పుడు భౌతికదూరం పాటించాలి

*తరగతులు, ప్రయోగశాలల్లో విద్యార్థులు తిరిగే లేదా తాకే ప్రాంతాలన్నింటిని ఉదయం , సాయంత్రం శానిటైజేషన్‌ చేయాలి. 

*కంప్యూటర్లు, ల్యాప్‌టాప్‌లు, ప్రింటర్లను క్రిమికీటకనాశనం చేయాలి.

*తాగునీరు, హ్యాండ్‌వాష్‌స్టేషన్లు, మూత్రశాలలు, మరుగుదొడ్లును పరిశుభ్రంగా ఉంచాలి.

*సిబ్బంది, ఉపాధ్యాయులు, విద్యార్థులు వాడిన మాస్క్‌లను ఎక్కడపడితే అక్కడ వెయ్యకుండా.. వాటికోసం ప్రత్యేక డస్ట్ బిన్ లు ఏర్పాటు చెయ్యాలి.

*విద్యార్థుల చేత ఎట్టి పరిస్థితుల్లో శానిటైజ్ పనులు‌ చేయించకూడదు.

*పాఠశాల ప్రాంగణంలో, ఆరుబయట, రోడ్లమీద గుమిగూడొద్దు.. విద్యార్థులు ఇలా ఉండకుండా ప్రత్యేకంగా ఒకరిని నియమించాలి.

*ఒకవేళ విద్యార్థులు, ఉపాధ్యాయులు అనారోగ్యానికి గురైతే వారిని పాఠశాలకు రావొద్దని ఆదేశించాలి. 

*టీచర్లు,స్కూల్‌ కౌన్సిలర్లు,స్కూల్‌ హెల్త్‌వర్కర్లు విద్యార్థుల్లో మానసిక స్థైర్యం, ధైర్యాన్ని నింపే ప్రయత్నం చేయాలి.

*విద్యార్థులు, ఉపాధ్యాయులకు ఒకవేళ కరోనా పాజిటివ్ గనక ‌వస్తే వెంటనే వారు తిరిగిన ప్రదేశాలను శానిటైజేషన్‌ చేయాలి.

పాఠశాలలు తెరిచిన తర్వాత..

*విద్యార్థులు, టీచర్లకు మధ్య కనీసం 6 ఫీట్ల భౌతికదూరం ఉండేట్లు చూసుకోవాలి. అందరికీ ఫేస్‌షీట్స్‌, మాస్క్‌లు ఉండేటట్లు చూసుకోవాలి.

*ఆల్కహాల్‌ బేస్డ్‌ శానిటైజర్‌తో తరచూ చేతులు కడుక్కోవాలి. తుమ్మినా, దగ్గినా మోచేతిని, చేతిరుమాలును అడ్డుపెట్టుకోవాలి. 

*పాఠశాల ప్రాంగణంలో ఉమ్మివేయకుండా చూడాలి.

*తక్కువ మంది విద్యార్థులతోనే ఈవెంట్స్‌ను నిర్వహించాలి. 

*హైరిస్క్‌ ఉన్నవారు.. అదనపు జాగ్రత్తలు తీసుకోవాలి.

*కరోనాపై ఉద్యోగులు, విద్యార్థుల్లో అవగాహన పెంచాలి.. అందుకోసం ఆరోగ్యసేతు యాప్ ను కూడా డౌన్ లోడ్ చేసుకోవాలి.

అందుబాటులో ఉంచాల్సినవి

*ఫేస్‌కవర్లు, మాస్కులు, పర్సనల్‌ ప్రొటెక్షన్‌ కిట్లు, హ్యాండ్‌ శానిటైజర్లను పెద్దఎత్తున నిల్వ ఉంచుకోవాలి.

*ఆల్కహాల్‌వైపర్లు, సబ్బులు, పల్స్‌ ఆక్సీమీటర్లు, థర్మల్‌గన్స్‌ ఐఈసీలను కూడా అంబాటులో ఉంచుకోవాలి.