అద్భుతం.. అమెరికా అధ్యక్ష భవనం మిలిటరీ బ్యాండ్ వాయించిన జై జగదీష్ హరే పాటకు నెటిజెన్స్ ఫిదా

America white house military band plays Om Jai Jagdish Hare song: అమెరికా అధ్యక్షుడు జో బైడెన్ అధికారిక నివాస భవనం వైట్ హౌజ్‌లో దీపావళి వేడుకలు ఘనంగా జరిగాయి. దీపావళి పూజ, వేడుకల్లో భాగంగా వైట్ హౌజ్ మిలిటరీ బ్యాండ్ చేత ' జై జగదీష్ హరే ' అనే భక్తి గీతాన్ని ప్లే చేయించారు. పియానో, వయోలిన్, సెలో, డ్రమ్స్ వాయిద్యాల కళాకారులు ఆ పాటను అద్భుతంగా వాయించారని ప్రశంసలు వెల్లువెత్తున్నాయి. ఇంటర్నేషనల్ మానిటరీ ఫండ్ ఫస్ట్ డిప్యూటీ మేనేజింగ్ డైరెక్టర్ గీత గోపీనాథ్ ఆ వీడియోను ఎక్స్ వేదికగా సోషల్ మీడియాలో పంచుకున్నారు. వైట్ హౌజ్ మిలిటరీ బ్యాండ్ వాయించిన జై జగదీష్ హరే గీతం అద్భుతంగా ఉందని గీతా గోపీనాథ్ తన ట్వీట్‌లో పేర్కొన్నారు.

గీతా గోపినాథ్ పోస్ట్ చేసిన ఈ వీడియోకు భారతీయుల నుండి భారీ స్పందన కనిపిస్తోంది. ఇప్పటికే వేల సంఖ్యలో నెటిజెన్స్ ఆ వీడియోను లైక్ చేసి తమ అభిప్రాయాలను కామెంట్స్ రూపంలో వ్యక్తపరుస్తున్నారు. వైట్ హౌజ్ మిలిటరీ బ్యాండ్ సంగీత వాయిద్యాలతో వాయించిన ఆ పాట విని భారతీయులు కూడా ఆనందం వ్యక్తంచేస్తున్నారు.

ఆ నలుగురు కళాకారులు ఎలాంటి లోపం లేకుండా నిజంగానే అద్భుతంగా బ్యాండ్ ప్లే చేశారు అని హర్షం వ్యక్తంచేస్తున్నారు. వారు ప్లే చేసిన తీరు ఎంతో ఆకట్టుకుంటోందని, వింటున్నంత సేపు భక్తి పారవశ్యంలో మునిగిపోయేలా చేసిందంటున్నారు.