Pushpa 2: ఆ విషయంపై కొనసాగుతోన్న సస్పెన్స్‌.. క్లారిటీ ఇవ్వని పుష్ప2 మేకర్స్‌

తెలుగు ప్రేక్షకులే కాకుండా యావత్‌ ఇండియన్‌ సినిమా ఇండస్ట్రీ వేయి కళ్లతో ఎదురు చూస్తున్న చిత్రం పుష్ప2. సుకుమార్‌ దర్శకత్వంలో, అల్లు అర్జున్‌ హీరోగా తెరకెక్కుతోన్న ఈ చిత్రంపై భారీ అంచనాలు ఉన్నాయి. పుష్ప ఫస్ట్ పార్ట్‌ ఇండస్ట్రీ హిట్‌గా నిలిచిన నేపథ్యంలో సీక్వెల్‌పై భారీ అంచనాలు ఏర్పడ్డాయి. పాన్‌ ఇండియా స్థాయిలో ఈ సినిమాకు మంచి బజ్ ఏర్పడింది.

ప్రస్తుతం షూటింగ్ చివరి దశకు చేరుకున్న ఈ సినిమాను డిసెంబర్‌ 6వ తేదీన విడుదల చేసేందుకు సిద్ధమవుతున్నారు. సెకండాఫ్‌కు సంబంధించి ఓ ఐటమ్‌ సాంగ్‌తో పాటు మరో 20 రోజుల వర్క్‌ పెండింగ్‌లో ఉంది. ఫహాద్‌ ఫాజల్‌కు సంబంధించిన కీలక సన్నివేశాలు ఈ 20రోజుల్లోనే పూర్తి చేయనున్నారు. ఇక ఈ సినిమాలో ఐటెం సాంగ్‌కు ఉన్న ప్రాధాన్యత ఎలాంటిదో ప్రత్యేకంగా చెప్పాల్సిన పనిలేదు. మొదటి పార్ట్‌లో సమంత నటించిన 'ఊ అంటావా' సాంగ్‌కు భారీ రెస్పాన్స్‌ లభించింది. దీంతో పుష్ప2లో ఐటెం సాంగ్‌పై అంచనాలు భారీగా ఏర్పడ్డాయి.

అయితే సీక్వెల్‌లో వచ్చే స్పెషల్‌ సాంగ్‌లో ఎవరు నటిస్తారన్న దానిపై ఇప్పటి వరకు ఎలాంటి అధికారిక ప్రకటన రాలేదు. గతంలో ఈ స్పెషల్‌ సాంగ్‌లో యానిమల్‌ బ్యూటీ త్రిప్తి దిమ్రి నటించనుందని వార్తలు వచ్చాయి. ఇందుకు బ్యూటీ కూడా ఓకే చెప్పిట్లు పుకార్లు షికార్లు చేశాయి. అయితే చిత్ర యూనిట్ మాత్రం దీనిపై ఎలాంటి క్లారిటీ ఇవ్వలేదు. దీంతో పుష్ప2లో ఐటెం సాంగ్‌పై సస్పెన్స్‌ కొనసాగుతూనే ఉంది. ఇంతకీ ఈ సాంగ్‌లో ఎవరు నటించనున్నారు.? సమంతను మించిన ఆ నటీమణి ఎవరై ఉంటారో తెలియాలంటే చిత్ర యూనిట్ అధికారిక ప్రకటన చేసే వరకు వేచి చూడాల్సిందే.