OTTలో విడుద‌ల కానున్న మెగా హీరో మూవీ

OTT: క‌రోనా సెకండ్ వేవ్ ప్ర‌భావం అన్ని రంగాల‌పై ప‌డింది. ఇక సినీ ఇండ‌స్ట్రీపై క‌రోనా ప్ర‌భావం తీవ్రంగానే ఉంద‌ని చెప్పాలి. 2020లో క‌రోనా కార‌ణంగా అనేక సినిమాలు విడుద‌ల‌కు నోచుకోలేదు. దీంతో సినిమాలు అన్ని ఓటీటీ వేదిక‌గా రిలీజ్ కావ‌డం మొద‌లు పెట్టాయి. ఈ ఏడాది మొద‌ట్లో క‌రోనా ప్ర‌భావం త‌గ్గి ప‌రిస్థితులు కుదుట‌ప‌డ‌డంతో సినిమాలు రిలీజులు ఊపందుకున్నాయి. క‌రోనా సెకండ్ వేవ్ పుణ్య‌మా అని మ‌ళ్లీ గ‌డ్డుప‌రిస్థితులు వ‌చ్చాయి. థియేట‌ర్లు మూత‌ప‌డే స‌రికి కొన్ని సినిమాల‌కు ఓటీటీనే ప్ర‌త్యామ్న‌యంగా క‌నిపించింది.

కరోనా సెకండ్‌ వేవ్‌ కారణంగా ఓటీటీల హవా మరింత పెరిగింది. ఇక థియేట‌ర్లు మూత‌ప‌డ్డా త‌ర్వాత‌ ఈ నెల‌లో 'బట్టల రామస్వామి బయోపిక్, సినిమా బండి, డి కంపెనీ, విజ‌య్ సేతుప‌తి ఇలా చిన్న సినిమాలు ఓటీటీలో విడుద‌ల అయ్యాయి. థియేటర్లు ఇప్పట్లో తెరిచే అవకాశం లేకపోవడంతో చిన్న సినిమాలతో పాటు పెద్ద మూవీస్‌ కూడా ఓటీటీ బాట పడుతున్నాయి.

మెగా మేనల్లుడు కళ్యాణ్ దేవ్ నటించిన సూపర్ మచ్చి సినిమా చిత్రీక‌ర‌ణ పూర్తై చాలా కాలం అవుతుంది. పులి వాసు ఈ సినిమాకు ద‌ర్శ‌క‌త్వం వ‌హించాడు. గతేడాదిలోనే ఈ సినిమా విడుదల కావాల్సి ఉంది. కానీ కరోనా కారణంగా వాయిదా పడుతూ వచ్చింది. ఈ నేపథ్యంలో ఈ సినిమాను ఓటీటీ ద్వారా రిలీజ్ చేయాలనే నిర్ణయానికి నిర్మాతలు వచ్చినట్టుగా ఒక వార్త వినిపిస్తోంది. ప్రముఖ ఓటీటీ అమెజాన్ ప్రైమ్ వీడియోతో చర్చలు జరుగుతున్నట్టు సమాచారం.

ఇప్ప‌టికే ప‌లు సినిమాలు ఓటీటీలో వ‌స్తాయ‌ని ప్ర‌చారం జ‌రిగింది. ర‌వితేజ న‌టించిన ఖిలాడి, బ‌న్నీ పుష్ప వంటి సినిమాలు ఓటీటీలో విడుద‌ల అవుతాయ‌ని ప్ర‌చారం సాగింది. అయితే ఓటీటీ విడుద‌ల చేయ‌డం లేద‌ని ద‌ర్శ‌క నిర్మాత‌లు క్లారిటీ ఇచ్చారు. క‌ళ్యాణ్ దేవ్ సూప‌ర్ మ‌చ్చి సినిమా ఓటీటీలో విడుద‌ల చేస్తార‌ని సోషల్ మీడియాలో ప్ర‌చారం సాగుతుంది. దీనిపై ఇంకా స్ప‌ష్టత రావాల్సివుంది .

సూపర్ మచ్చి సినిమాను రిజ్వాన్ ఎంటర్‌టైన్మెంట్ బ్యానర్‌పై రిజ్వాన్, ఖుషి కలసి సంయుక్తంగా నిర్మిస్తున్నారు. ఈ సినిమాలో నటకిరీటి రాజేంద్ర ప్రసాద్, రియా చక్రవర్తి, రచితా రామ్, పోసాని కృష్ణ మురళి, నరేష్‌, భద్రం, ప్రగతి, అజ‌య్‌, 'జబర్దస్త్' మహేష్, పృథ్వీ కీలక పాత్రల్లో నటిస్తున్నారు. ఎస్ఎస్ థమన్ సంగీతం సమకూర్చారు. విజేత సినిమాతో ఇండస్ట్రీకీ పరిచయమైన కళ్యాణ్ దేవ్ కు ఆ సినిమా పెద్ద సక్సెస్ ఇవ్వలేదు. ఆ సినిమాలో కళ్యాణ్ నటనకు మంచి మార్కులే పడ్డాయి. 'సూపర్ మచ్చి' తో ఎలాగైనా హిట్ సాధించాలనే పట్టుదలతో ఉన్నాడు.