Sardar 2: 'సర్దార్‌2' షూటింగ్‌లో ప్రమాదం.. 20 అడుగుల ఎత్తు నుంచి..

Sardar 2: కార్తి హీరోగా తెరకెక్కిన 'సర్దార్‌' చిత్రానికి సీక్వెల్ తెరకెక్కుతోన్న విషయం తెలిసిందే. స్పై నేపథ్యంలో వచ్చిన ఈ సినిమా బాక్సాఫీస్‌ వద్ద మంచి విజయాన్ని నమోదు చేసుకోవడంతో ఈ సినిమాకు సీక్వెల్‌ను తెరకెక్కిస్తున్నారు. ఇటీవల ఈ సినిమా షూటింగ్ అధికారికంగా ప్రారంభమైంది. అయితే తాజాగా ఈ సినిమా సెట్‌లో ప్రమాదం జరిగింది. స్టంట్‌ మ్యాన్‌ ఎజులమై మృతి చెందాడు.

ఫైట్‌ సీన్స్‌ ప్రాక్టీస్‌ చేస్తోన్న స్టంట్‌ మ్యాన్‌ ఎజుమలై ప్రమాదవశాత్తూ 20 అడుగుల ఎత్తు నుంచి కిందపడ్డాడు. చిత్రయూనిట్‌ వెంటనే స్పందించి అతడిని ఆస్పత్రికి తరలించారు. అంత ఎత్తు నుంచి కిందపడటం వల్ల ఛాతీ భాగంలో తీవ్ర గాయం, ఊపిరితిత్తుల్లో రక్తస్రావం కావడంతో అతను మరణించినట్లు వైద్యులు స్పష్టం చేశారు. దీంతో ప్రమాదంపై స్థానిక పోలీసులు కేసు నమోదు చేసుకొని దర్యాప్తు మొదలుపెట్టారు. చెన్నైలోని ప్రసాద్ ల్యాబ్స్‌లో వేసిన సెట్స్‌లో ఈ ప్రమాదం చోటు చేసుకుంది.

ఇదిలా ఉంటే సర్దార్‌ 2 షూటింగ్ సోమవారం నుంచి ప్రారంభమైంది. ఇందులో కార్తీ డ్యూయల్‌ రోల్‌లో నటిస్తున్న విషయం తెలిసిందే. స్పై నేపథ్యంలో వచ్చిన సర్దార్‌ మూవీ ఏకంగా రూ. 100 కోట్లు రాబట్టిన విషయం తెలిసిదే. ప్రిన్స్‌ పిక్చర్స్‌ పతాకంపై నిర్మాత లక్ష్మణ్‌కుమార్ ఈ చిత్రాన్ని నిర్మిస్తున్నారు. తొలి భాగానికి జీవీ ప్రకాష్‌ సంగీతం సమకూర్చగా, రెండో భాగానికి మాత్రం యువన్‌ శంకర్‌ రాజా సంగీతం అందిస్తున్నారు.