SSMB 29: రాజమౌళి, మహేష్ బాబు మూవీ బడ్జెట్ రూ. 1000 కోట్లు, బిజినెస్ రూ. 2,000+ కోట్లు

SSMB 29: రాజమౌళి డైరెక్షన్‌లో ప్రిన్స్ మహేష్ బాబు హీరోగా SSMB29 సినిమా తెరకెక్కనుంది. ప్రాజెక్ట్ లొకేషన్ల కోసం దర్శకుడు రాజమౌళి అన్వేషణ కొనసాగుతోంది. ఈ నేపథ్యంలో దీనిపై దర్శక నిర్మాత తమ్మారెడ్డి భరద్వాజ ఓ ఇంటర్వ్యూలో ఆసక్తికర కామెంట్స్ చేశారు. ఈ ప్రాజెక్ట్ తర్వాత ప్రపంచమంతా తెలుగు సినిమా గురించే మాట్లాడుకుంటుందని.. తెలుగు సినిమా ఎవరూ ఊహించని స్థాయికి ఎదుగుతుందని అన్నారు. ప్రాజెక్ట్ బడ్జెట్ కచ్చితంగా రూ.వెయ్యి కోట్లు దాటవచ్చని భరద్వాజ అంచనా వేశారు.

బాహుబలి సినిమా విడుదలయ్యాక తెలుగు సినిమా స్థాయి పెరిగిందన్నారు. రూ. 100 కోట్ల సినిమా అంటే సాధారణ అంశంలా మారిపోయిందన్నారు. ఇక ఎన్టీఆర్, రామ్ చరణ్ ప్రధాన పాత్రల్లో వచ్చిన ఆర్ఆర్ఆర్ మూవీ తరువాత రూ.300 కోట్లు చిన్న బడ్జెట్‌గా కనిపిస్తోందని చెప్పారు. ప్రస్తుతం భరద్వాజ్ చేసిన వ్యాఖ్యలు సోషల్ మీడియాలో వైరల్‌గా మారాయి.

ప్రస్తుతం SSMB29 ప్రాజెక్ట్ బిజినెస్ ఊహించడం చాలా కష్టమన్నారు. సినిమా రూ. 2వేల కోట్ల బిజినెస్ జరుపుతుందని తమ్మారెడ్డి భరద్వాజ అంచనా వేశారు. సుమారు రూ.3-4 వేల కోట్ల వరకు వసూలు చేయొచ్చన్నారు. ఈ సినిమాలో అంతర్జాతీయ స్థాయి నటులు నటిస్తారని తెలిపారు. భవిష్యత్తును రాజమౌళి చాలా బాగా ఊహిస్తారని ప్రశంసించారు.

SSMB29 ద్వారా రాజమౌళి మరోసారి సత్తా చాటుతారని చెప్పారు. ఈ సినిమా పెద్ద మొత్తంలో కలెక్షన్స్ వసూలు చేస్తే భారతదేశ సినీరంగంలోనే చరిత్ర సృష్టించినట్లు అవుతుందని భరద్వాజ ఆశాభావం వ్యక్తం చేశారు. SSMB29 తర్వాత తెలుగు సినిమా పరిశ్రమ మరింత ఎత్తుకు ఎదగాలని తాను కోరుకుంటున్నానని తెలిపారు.

పాన్ ఇండియా మూవీని తెరకెక్కిస్తే సరిపోదు.. ఆ రేంజ్ మూవీని మార్కెట్ చేయడం కూడా తెలియాలి. అందులో రాజమౌళిని మించిన వారు ఎవరూ లేరు. అది మాత్రమే కాదు.. ఓ భారీ సినిమాను తీసుకువచ్చే ముందు.. ఆడియన్స్‌ను ఎలా ప్రిపేర్ చేయాలో కూడా రాజమౌళికి బాగా తెలుసు. ఇప్పుడు రాజమౌళి SSMB29 కోసం లొకేషన్ అన్వేషణ స్పెషల్ ఇంట్రెస్ట్‌ను క్రియేట్ చేస్తోంది.

ఇక రీసెంట్‌గా రాజమౌళి ఓ సింహం ఫొటో ముందు నిలబడి ఉన్న ఫొటోను షేర్ చేశారు. అది చూసిన వారంతా సినిమా కథ అంతా ఓ సింహం చుట్టూ తిరుగుతుందంటూ కామెంట్స్ చేశారు. గతంలో రాజమౌళి తీసిని ఈగ సినిమా మంచి సస్సెస్ అయింది. ఇలాంటి సినిమాలు తీయడం రాజమౌళికే సాధ్యమంటున్నారు ఆడియన్స్.