Ram charan Donation: వరద బాధితుల కోసం రామ్ చరణ్ విరాళం.. ట్వీట్
తెలంగాణ, ఏపీ రాష్ట్రాల్లో వరదల కారణంగా సర్వం కోల్పోయిన కుటుంబాలకు సాయం చేసే దిశగా రామ్ చరణ్ విరాళం ప్రకటించారు.
Ram charan Donation: మెగా పవర్ స్టార్ రామ్ చరణ్ వరద బాధితులకు సహాయం చేసేందుకు ముందుకొచ్చారు. కష్టాల్లో ఉన్న వరద బాధితులను ఆదుకునేందుకు తన వంతుగా ఏపీ, తెలంగాణ రాష్ట్రాల సీఎం రిలీఫ్ ఫండ్ కోసం రూ. 1 కోటి విరాళం ప్రకటిస్తున్నట్లుగా రామ్ చరణ్ ఎక్స్ వేదికగా ప్రకటించారు. భారీ వర్షాలు, వరదల వల్ల తీవ్ర ఇబ్బందులు పడుతున్న రెండు తెలుగు రాష్ట్రాల ప్రజలు ఈ దుస్థితి నుండి త్వరగా బయటపడాలని ఆ దేవుడిని ప్రార్థిస్తున్నాను అని రామ్ చరణ్ తన ప్రకటనలో పేర్కొన్నారు.
మెగా ఫ్యామిలీ నుండి మెగాస్టార్ చిరంజీవి సైతం రెండు తెలుగు రాష్ట్రాలకు చెరో రూ. 50 లక్షల చొప్పున మొత్తం కోటి రూపాయల ఆర్ధిక సహాయం ప్రకటించిన విషయం తెలిసిందే.
తెలంగాణ, ఏపీలో వరద ప్రభావం వల్ల ప్రజలకు కలిగిన, కలుగుతున్న కష్టాలు తనను కలిచివేశాయని చిరంజీవి ఆవేదన వ్యక్తంచేశారు. పదుల సంఖ్యలో అమాయకులు ప్రాణాలు కోల్పోవడంపై విచారం వ్యక్తంచేసిన చిరంజీవి.. తెలుగు రాష్ట్రాల ముఖ్యమంత్రుల నిర్దేశంలో రెండు రాష్ట్రాల ప్రభుత్వాలు పరిస్థితిని మెరుగు పరిచేందుకు శాయశక్తులా కృషి చేస్తున్నాయి అని తన ట్వీట్‌లో పేర్కొన్నారు.