OTT Movies: సినీ లవర్స్‌కి పండగే.. ఈ వారం ఓటీటీలో సందడి చేయనున్న చిత్రాలివే..!

OTT Telugu Movies Releases This Week: ఒకప్పుడు శుక్రవారం వచ్చిందంటే థియేటర్లలో సినిమా సందడి ఉండేది. వారంతంలో సినిమా విడుదల కోసం మూవీ లవర్స్‌ వేయి కళ్లతో ఎదురు చూస్తుండే వారు. ప్రస్తుతం రోజులు మారాయి. ఎప్పుడైతే ఓటీటీ అందుబాటులోకి వచ్చిందో అప్పటి నుంచి సినిమా చూసే విధానం కూడా మారిపోయింది. దీంతో వారంతం వస్తుందంటే చాలు ఏ ఓటీటీలో ఏ సినిమా విడుదలవుతోందని ప్రేక్షకులను ఆసక్తిగా ఎదురు చూస్తున్నారు. ఎప్పటిలాగే ఈ వారాంతం కూడా ఓటీటీ వేదికగా పలు సినిమాలు, వెబ్‌ సిరీస్‌లు విడుదలకు సిద్ధంగా ఉన్నాయి. అవేంటో ఇప్పుడు తెలుసుకుందాం.

గ్యాంగ్స్‌ ఆఫ్‌ గోదావరి..

విశ్వక్‌ సేన్‌ హీరోగా తెరకెక్కిన గ్యాంగ్స్ ఆఫ్‌ గోదావరి మే 31వ తేదీన థియేటర్లలో విడుదలైన విషయం తెలిసిందే. నేహాశెట్టి హీరోయిన్‌గా అంజలి కీలక పాత్రలో నటించిన ఈ సినిమా బాక్సాఫీస్ వద్ద మిక్స్‌డ్ టాక్‌ను సొంతం చేసుకుంది. దీంతో త్వరగానే ఓటీటీలో సందడి చేసేందుకు సిద్ధమైంది. జూన్‌ 14వ తేదీన నెట్‌ఫ్లిక్స్‌లో ఈ మూవీ స్ట్రీమింగ్‌ కానుంది. ఇదిలా ఉంటే ఈ సినిమాను సితార ఎంట‌ర్‌టైన్‌మెంట్స్ తో క‌లిసి దర్శకుడు త్రివిక్ర‌మ్ ప్రొడ్యూస్ చేసిన విషయం తెలిసిందే.

రష్‌..

దర్శకుడు అల్లరి రవిబాబు కథను అందిస్తూ నిర్మాతగా వ్యవహరించిన రష్‌ మూవీ నేరుగా ఓటీటీలో స్ట్రీమింగ్ మొదలైంది. గురువారం (ఈరోజు) నుంచి స్ట్రీమింగ్ అవుతోంది. కూతురితో పాటు భ‌ర్త‌ను కాపాడుకోవ‌డానికి ఓ గృహిణి చేసిన సాహ‌సం నేప‌థ్యంలో తెరకెక్కిన ఈ సినిమా ప్రేక్షకులను ఆకట్టుకుంటోంది.

పారిజాతపర్వం..

చైత‌న్య‌రావు, సునీల్, శ్ర‌ద్ధాదాస్ ప్ర‌ధాన పాత్ర‌ల్లో న‌టించిన పారిజాత‌ప‌ర్వం సినిమా ఆహా ఓటీటీలో జూన్‌ 12వ తేదీ నుంచి స్ట్రీమింగ్ అవుతోంది. క్రైమ్ కామెడీ క‌థాంశంతో తెర‌కెక్కిన ఈ సినిమాకు సంతోష్ కంభంపాటి ద‌ర్శ‌క‌త్వం వ‌హించారు. ఆహాలో స్ట్రీమింగ్ అవుతోన్న ఈ సినిమా ప్రేక్షకులను ఆకట్టుకుంటోంది.

డియర్‌ నాన్న..

చైతన్యరావు హీరోగా నటించిన డియర్‌ నాన్న సినిమా ఆహాలో స్ట్రీమింగ్ కానుంది. జూన్‌ 14వ తేదీ నుంచి ఈ సినిమా స్ట్రీమింగ్ కానుంది. తండ్రీకొడుకుల అనుబంధంతో రూపొందిన ఈ మూవీకి సంతోష్ కంభంపాటి ద‌ర్శ‌క‌త్వం వ‌హించాడు. ఈ సినిమా నేరుగా ఓటీటీలో విడుదలవుతోంది.

పరువు (వెబ్ సిరీస్‌)..

సినిమాలతో పాటు వెబ్‌ సిరీస్‌లు సైతం ఈ వీకెండ్ ప్రేక్షకులను అలరించేందుకు సిద్ధమవుతున్నాయి. ఇందులో భాగంగానే నివేతా పేతురాజ్‌ ప్రధాన పాత్రలో తెరకెక్కిన పరువు వెబ్‌ సిరీస్‌ శుక్రవారం నుంచి స్ట్రీమింగ్ కానుంది. జీ5 ఓటీటీలో స్ట్రీమింగ్ కానుంది. చిరంజీవి కూతురు సుస్మిత కొణిదెల ఈ వెబ్‌సిరీస్‌కు నిర్మాత వ్యవహరించడం విశేషం. ఈ సిరీస్‌పై ఉత్కంఠ నెలకొంది.

యక్షిణి..

హారర్‌ ఫాంటసీ కథాంశంతో తెరకెక్కిన యక్షిణి.. జూన్‌ 14వ తేదీ నుంచి స్ట్రీమింగ్ కానుంది. డిస్నీ ప్లస్ హాట్‌స్టార్‌ వేదికగా ఈ వెబ్‌ సిరీస్‌ స్ట్రీమింగ్‌ కానుంది. బాహుబలి ప్రొడ్యూసర్స్‌ ఈ వెబ్‌ సిరీస్‌ను నిర్మించడం విశేషం.