Squid Game 2: వామ్మో.. 'చావు గేమ్‌' మళ్లీ వస్తోంది.. స్క్విడ్‌ గేమ్‌ 2 టీజర్‌ చూశారా.?

Squid Game 2: ప్రముఖ కొరియన్‌ వెబ్‌ సిరీస్‌ 'స్క్విడ్‌ గేమ్‌'కు ప్రపంచవ్యాప్తంగా ఎంతటి ఆదరణ లభించిందో ప్రత్యేకంగా చెప్పాల్సిన పనిలేదు. ఓటీటీ ప్లాట్‌ఫామ్‌ నెట్‌ఫ్లిక్స్‌ వేదికగా 2021లో ఈ వెబ్ సిరీస్‌ స్ట్రీమింగ్‌కు వచ్చింది. ప్రపంచంలోని చాలా భాషల్లో ఈ సిరీస్ విడుదలైంది. తెలుగులోనూ ఈ సిరీస్‌ స్ట్రీమ్‌ చేశారు. కాగా ఇప్పుడు ఈ సిరీస్‌కు కొనసాగింపుగా స్క్విడ్‌ గేమ్‌ 2 వస్తోంది. ఇప్పటికే షూటింగ్‌ పూర్తి చేసుకున్న ఈ వెబ్‌ సిరీస్‌ డిసెంబర్ 26వ తేదీ నుంచి స్ట్రీమింగ్ కానుంది.

దీంతో మేకర్స్ ప్రమోషన్స్‌లో వేగాన్ని పెంచారు. ఇందులో భాగంగానే తాజాగా స్క్విడ్‌ గేమ్‌ 2 వెబ్ సిరీస్‌కు సంబంధించిన టీజర్‌ను విడుదల చేశారు. గత సీజన్‌లో స్క్విడ్‌ గేమ్‌లో విజేతగా నిలిచి బయటపడ్డ సియోంగ్ గి-హున్ మరోసారి ఇందులో పాల్గొంటాడు. అయితే ఈసారి అతను ఆట కంటే ముఖ్యంగా ఈ గేమ్‌కు హాజరైన వారిని బతికించాలనే ఉద్దేశంతో ఉన్నట్లు టీజర్‌ చూస్తే స్పష్టమవుతోంది. అయితే డబ్బుపై ఆశతో ఉన్న కంటెస్టెంట్స్‌ మాత్రం ఎట్టి పరిస్థితుల్లో ఆటను కొనసాగిస్తామని తేల్చి చెబుతుంటారు.

ఇక ఈ సీక్వెల్‌లో కూడా థ్రిల్లర్‌ ఎలిమెంట్స్‌ ఉండేలా స్పష్టమవుతోంది. మొదటి సీజన్‌లో ఉన్నట్లే ఇందులో కూడా గ్రీన్‌లైట్‌, రెడ్‌లైట్‌ గేమ్‌ ఉన్నట్లు తెలుస్తోంది. ఇక ఈ వెబ్‌ సిరీస్‌ విషయానికొస్తే ఈ సిరీస్‌ను రూపొందించడానికి మేకర్స్‌కు ఏకంగా 12 ఏళ్లు పట్టింది. ప్రపంచవ్యాప్తంగా ప్రేక్షకులను మంత్రముగ్దుల్ని చేసిన ఈ వెబ్‌ సిరీస్‌ నెట్‌ఫ్లిక్స్‌లో ఏకంగా 111 మిలియన్ల వ్యూస్‌ సొంతం చేసుకుంది. దీంతో ఈ సీక్వెల్‌పై కూడా అంచనాలు ఒక్కసారిగా పెరిగిపోయాయి. మరి స్క్విడ్‌ గేమ్‌ 2 ప్రేక్షకులను ఏమేర ఆకట్టుకుంటుంది. ఎలాంటి రికార్డులను సృష్టిస్తుందో తెలియాలంటే మరికొన్ని రోజులు వేచి చూడాల్సిందే.