Meenakshi Chaudhary: చిరు సినిమాలో మీనాక్షి నటిస్తోందా.? క్లారిటీ ఇచ్చిన బ్యూటీ..

Meenakshi Chaudhary: చిరంజీవి హీరోగా తెరకెక్కుతోన్న చిత్రం 'విశ్వంభర'. వశిష్ట దర్శకత్వం వహిస్తున్న ఈ సినిమాపై భారీ అంచనాలు ఉన్నాయి. చిరు అభిమానులు మాత్రమే కాకుండా, యావత్‌ సినిమా ఇండస్ట్రీ మొత్తం ఈ సినిమా కోసం ఎదురు చూస్తోంది. గతంలో ఎన్నడూ కనిపించని విభిన్నమైన పాత్రలో చిరు ఈ సినిమాలో కనిపించనున్నారన్న వార్తలు సినిమాపై అంచనాలను ఒక్కసారిగా పెంచేశాయి. ఇప్పటికే విడుదలైన ఈ సినిమా టీజర్ ప్రేక్షకులను ఆకట్టుకుంటోంది.

ఇక ఈ సినిమాను ఏకంగా రూ. 200 కోట్ల భారీ బడ్జెట్‌తో చిత్ర యూనిట్ ప్రతిష్టాత్మకంగా తెరకెక్కిస్తున్నారు. ఇదిలా ఉంటే ఈ చిత్రంలో ఐదుగురు హీరోయిన్స్‌ నటించనున్నారని వార్తలు వచ్చిన విషయం తెలిసిందే. ఇప్పటికే త్రిష, ఆషికా రంగనాథ్‌ ఈ సినిమాలో నటిస్తున్నారని అధికారిక ప్రకటన వచ్చింది. అయితే తాజాగా ఈ సినిమాలో మీనాక్షి చౌదరి కూడా నటిస్తోందని నెట్టింట గత కొన్ని రోజులుగా పెద్ద ఎత్తున చర్చ నడుస్తోంది.

దీంతో ఈ వార్తలపై మీనాక్షి క్లారిటీ ఇచ్చే ప్రయత్నం చేశారు. మీనాక్షి నటించిన తాజా చిత్రం 'లక్కీ భాస్కర్‌' విడుదలకు సిద్ధంగా ఉన్న విషయం తెలిసిందే. ఈ సినిమా ప్రమోషన్స్‌లో భాగంగా ఇచ్చిన ఓ ఇంటర్వ్యూలో ‘విశ్వంభర’లో తాను నటిస్తున్నాని వస్తోన్న వార్తలపై మీనాక్షి స్పందించారు. ‘నేను విశ్వంభరలో భాగం కాదు. ఆ చిత్రంలో నటిస్తున్నట్లు నేనెప్పుడూ చెప్పలేదు. కానీ, అందులో నటిస్తున్నట్లు అందరూ రాసేస్తున్నారు. ప్రతి ఇంటర్వ్యూలో ‘విశ్వంభర’పై ప్రశ్న అడుగుతున్నారు. నటించే సినిమాల గురించి స్వయంగా వెల్లడిస్తాను. నేను చెప్పలేదు అంటే ఆ చిత్రంలో లేనని అర్థం’ అని స్పష్టం చేసింది.

ఇదిలా ఉంటే ప్రస్తుతం శరవేగంగా షూటింగ్‌ జరుపుకుంటోన్న విశ్వంభర చిత్రాన్ని సంక్రాంతి కానుకగా విడుదల చేయాలని చిత్ర యూనిట్ భావించింది. అయితే సంక్రాంతికి రామ్‌చరణ్‌ నటిస్తున్న గేమ్‌ ఛేంజర్‌ విడుదల ఉండడంతో విశ్వంభరను వాయిదా వేస్తున్నట్లు చిత్ర యూనిట్ ప్రకటించింది. త్వరలోనే సినిమా విడుదల తేదీకి సంబంధించి ప్రకటన చేయనున్నట్లు తెలుస్తోంది.