Mahesh Babu: రెండు అవతారాల్లో కనిపించనున్న మహేష్ బాబు

Mahesh Babu's role in Rajamouli movie: ప్రిన్స్ మహేష్ బాబుతో దర్శకుడు రాజమౌళి తెరకెక్కిస్తున్న సినిమా SSMB29. ఈ సినిమాపై భారీ అంచనాలున్నాయి. ఈ సినిమాకు సంబంధించి ఇంత వరకు ఎటువంటి అప్డేట్ రాలేదు. గాసిప్స్ మాత్రం వైరల్ అవుతున్నాయి. ఈ సినిమా అప్డేట్స్ కోసం ఆడియన్స్ ఎంతగానో వెయిట్ చేస్తున్నారు. కానీ రాజమౌళి మాత్రం సైలెంట్‌గా తన పని తాను చేసుకుపోతున్నారు. ఇటీవల రాజమౌళి ఎడారి ప్రాంతంలో తిరుగుతున్న ఫొటో షేర్ చేయడంతో మహేష్ సినిమా కోసం లొకేషన్స్ సెర్చ్ చేస్తున్నట్టుగా క్లారిటీ వచ్చింది. కనీసం ఇలాగైనా అప్‌డేట్ ఇచ్చారంటూ అభిమానులు ఆనందం వ్యక్తం చేశారు. ఈ నేపథ్యంలో సినిమాకు సంబంధించిన ఓ ఇంట్రెస్టింగ్ న్యూస్ చక్కెర్లు కొడుతోంది.

ఈ సినిమాలో మహేష్ బాబు రాముడిగా కనిపించబోతున్నట్టుగా టాక్ వినబడుతోంది. మహేష్ బాబు-రాజమౌళి కాంబోలో రూపుదిద్దుకుంటున్న సినిమా స్టోరీకి రామాయణానికి పరోక్షంగా ఓ లింక్ ఉందన్నది ఇన్‌సైడ్ వర్గాల టాక్. ఓ సందర్భంలో మహేష్ బాబు రాముడి అవతారంలో కనిపించబోతున్నాడట. వారణాసిలో ఈ కీలక సన్నివేశాల చిత్రీకరణ జరగనుందని కొందరు అంటుంటే.. మరికొందరేమో హైదరాబాద్ శివార్లలో కాశీ సెట్ నిర్మిస్తున్నారని చెబుతున్నారు.

రాముడిగా మహేష్ బాబు కనిపించబోతున్నాడనే వార్త బయటికి రావడంతో.. ఫ్యాన్స్ ఎవరికి నచ్చిన విధంగా వారు మహేష్ బాబును రాముని అవతారంలో రెడీ చేసి ఫొటోలు షేర్ చేస్తున్నారు. ఇదిలా ఉంటే మహేష్ మేనల్లుడు అశోక్ గల్లా నటిస్తున్న దేవకీ నందన వాసుదేవ సినిమాలో మహేష్ బాబు కృష్ణుడి పాత్రలో నటిస్తున్నారంటూ గత కొన్ని రోజులుగా వార్తలు వినిపిస్తున్నాయి.

మొత్తానికి రెండు సినిమాల్లో రాముడిగా, కృష్ణుడిగా మహేష్ బాబు నటిస్తున్నారన్న టాక్ ఆసక్తికరంగా మారింది. అభిమానులు కూడా ఆయన్ని అలా రెండు రూపాల్లో చూడనున్నామని ఆనందం వ్యక్తం చేస్తున్నారు. SSMB29 సినిమాకు ఇండోనేషియాకు చెందిన ఓ అమ్మాయిని హీరోయిన్‌గా తీసుకున్నారని సమాచారం. ఫిబ్రవరి నుంచి రెగ్యులర్ షూటింగ్ మొదలు కాబోతోందని తెలుస్తోంది. ఇక ఈ సినిమాకు కీరవాణి సంగీతం అందించనున్నారు.