Akkada Ammayi Ikkada Abbayi Movie Review: ప్రదీప్‌, దీపికా జోడి మెప్పించారా.? 'అక్కడ అమ్మాయి ఇక్కడ అబ్బాయి' ఎలా ఉంది.

టైటిల్‌ : అక్కడ అమ్మాయి ఇక్కడ అబ్బాయి’

నటీనటులు: ప్రదీప్‌ మాచిరాజు, దీపికా పిల్లి, వెన్నెల కిశోర్, బ్రహ్మానందం, సత్య, గెటప్‌ శ్రీను, మురళీధర్‌ గౌడ్‌,రోహిణి, ఝాన్సీ తదితరులు

నిర్మాణ సంస్థలు: మాంక్స్‌ అండ్‌ మంకీస్‌

నిర్మాత: మాంక్స్‌ అండ్‌ మంకీస్‌ బ్యానర్‌

ఎడిటింగ్: కొడాటి పవన్‌ కల్యాణ్‌

దర్శకత్వం, స్క్రీన్‌ప్లే: నితిన్‌–భరత్‌

కథ, డైలాగ్స్‌: సందీప్‌ బొల్లా

సంగీతం: రధన్‌

సినిమాటోగ్రఫీ: ఎమ్‌ఎన్‌ బాల్‌రెడ్డి

విడుదల: ఏప్రిల్‌ 11, 2025

టీవీ యాంకర్ టర్న్డ్ హీరో ప్రదీప్ మాచిరాజు మోస్ట్ ఎవైటెడ్ మూవీ 'అక్కడ అమ్మాయి ఇక్కడ అబ్బాయి'. ఈ యూనిక్ లవ్ అండ్ ఫ్యామిలీ ఎంటర్‌టైనర్‌ను యంగ్ ట్యాలంటెండ్ డైరెక్టర్స్ నితిన్, భరత్ దర్శకత్వం వహిస్తున్నారు. మాంక్స్ & మంకీస్ బ్యానర్ నిర్మిస్తున్న ఈ ఎగ్జైటింగ్ ఎంటర్‌టైనర్‌లో దీపికా పిల్లి కథానాయికగా నటిస్తోంది. టీజర్, ట్రైలర్, పాటలు ఇప్పటికే అద్భుతమైన రెస్పాన్స్ అందుకున్నాయి. ఈ సినిమా వేసవిలో వన్ అఫ్ ది బిగ్గెస్ట్ ఎట్రాక్షన్ గా ఏప్రిల్ 11న థియేటర్లలోకి వచ్చింది.మరి ఈ సినిమా ఎలా ఉంది, ప్రేక్షకులను ఎంతవరకు ఆకట్టుకుంది అనేది ఇప్పుడు రివ్యూలో చూద్దాం, పదండి.

అక్కడ అమ్మాయి ఇక్కడ అబ్బాయి కథ:

కృష్ణ (యాంకర్ ప్రదీప్) హైదరాబాద్‌లోని ఒక కన్స్ట్రక్షన్ కంపెనీలో సివిల్ ఇంజనీర్‌. ఆంధ్ర-తమిళనాడు బోర్డర్‌లో ఒక గ్రామంలో మరుగుదొడ్లు నిర్మించే కాంట్రాక్ట్ ఆ కంపెనీకి దక్కడంతో, తన డ్రైవర్(సత్య)తో కలిసి ప్రదీప్ ఆ ఊరికి వెళ్తాడు. అయితే, ఆ ఊరికి కొన్ని కట్టుబాట్లు ఉంటాయి. వాటిని బట్టి ఆ ఊరిలోకి కొత్త వాళ్ళను రానివ్వరు. కానీ ప్రభుత్వ పని కావడంతో కొన్ని నిబంధనల మేరకు వారిని లోపలికి రాణిస్తారు. నిజానికి ఆ ఊరిలో 60 మంది కుర్రాళ్లకు గానూ ఏకైక అమ్మాయి రాజా(దీపిక) ఉంటుంది. ఆమెను ఆ గ్రామానికి అదృష్ట దేవతగా భావించి, ఆమె ఆ 60 మంది కుర్రాళ్లలో ఎవరో ఒకరిని వివాహం చేసుకోవాలని, ఆ వివాహం చేసుకున్న వారిని ప్రెసిడెంట్‌గా చేయాలని ఊరి వారంతా ముందే ఫిక్స్ అవుతారు. అయితే, అనుకోకుండా రాజాను కృష్ణ కలవడమే కాకుండా, మొదటి కలయికలోనే ముద్దు పెడతాడు. అసలు ఆమెను చూడాలంటేనే ఊరిని దాటుకు వచ్చే పరిస్థితిని దాటి నెమ్మదిగా వారి మధ్య ప్రేమ చిగురిస్తుంది. ఆ తరువాత ఏమైంది? కృష్ణ, రాజా ఒక్కటయ్యారా? వారి ప్రేమ గురించి ఊరిలో తెలిసిందా? తెలిశాక ఊరి వాళ్ళ రియాక్షన్ ఏంటి? అనే విషయాలు తెలియాలి అంటే సినిమాను బిగ్ స్క్రీన్ మీద చూడాల్సిందే.

విశ్లేషణ :

ప్రదీప్ హీరోగా, దీపిక పిల్లి హీరోయిన్‌గా ఈ సినిమా వస్తుందని అనౌన్స్ చేసినప్పటి నుంచి సినిమాపై అంచనాలు ఉన్నాయి. ఎందుకంటే, జబర్దస్త్ ఆర్టిస్టులు డైరెక్ట్ చేయడం, "30 రోజుల్లో ప్రేమించడం ఎలా" సినిమా తర్వాత ప్రదీప్ హీరోగా నటించడంతో, ఈ సినిమా ఎలా ఉంటుందో అని అందరూ ఆసక్తిగా ఎదురుచూశారు. ఇక, ఈ సినిమా స్టార్టింగ్ నుంచి ఫన్ మోడ్‌లోనే సాగుతుంది. తమిళనాడు సరిహద్దులోని ఒక ఆంధ్ర గ్రామంలో పుట్టిన ఏకైక అమ్మాయి రాజాను ఆ ఊరి యువకులందరూ అల్లారుముద్దుగా చూసుకుంటూ ఉంటారు. 60 మందిలో ఒకరిని ఆమె వివాహం చేసుకుంటే, ఆ ఒక్కరికి ఊరికి ప్రెసిడెంట్ పదవిని వారసత్వంగా కట్టబెట్టి, ఊరిని జాగ్రత్తగా చూసుకునేలా ఆ ఊరి పెద్ద ప్లాన్ చేస్తాడు. అయితే, అనుకోకుండా ఆ ఊరికి సివిల్ ఇంజనీర్‌గా వచ్చిన ప్రదీప్ ఆ ఊరి అమ్మాయితో ప్రేమలో పడడంతో అసలు కథ మొదలవుతుంది. దీన్ని ముందుకు ఎలా తీసుకెళ్తారని ఆసక్తిగా ఎదురుచూస్తున్న సమయంలో, ఒక ఆసక్తికరమైన ఇంటర్వెల్‌తో ఫస్ట్ హాఫ్ ముగించారు. ఫస్ట్ హాఫ్ అంతా కామెడీతో ఆకట్టుకునేలా రాసుకున్నారు. చాలా చోట్ల సత్య-ప్రదీప్ ట్రాక్‌తో పాటు సత్య, గెటప్ శ్రీను ట్రాక్‌లు బాగా పేలాయి.

అయితే, ఫస్ట్ హాఫ్ ఎంత ఆసక్తికరంగా సాగిందో, సెకండ్ హాఫ్ మాత్రం కూడా అంతే ఆసక్తికరంగా మలచడంలో దర్శక ద్వయం సఫలం అయింది . కాక పోతే ఫస్ట్ హాఫ్ కామెడీ చాలా ఆర్గానిక్‌గా వస్తే, సెకండ్ హాఫ్‌లో కామెడీ మాత్రం కాస్త ఫోర్స్డ్‌గా అనిపిస్తుంది. ఇలాంటి కథతో గతంలో సినిమాలు రాలేదు కానీ, సిమిలర్ లైన్‌తో కొన్ని మాత్రం సినిమాలు వచ్చాయి. హీరో-హీరోయిన్‌ల పెళ్లి కావాలంటే, హీరోయిన్ చెల్లెళ్లకు లేదా హీరో చెల్లెళ్లకు పెళ్లిళ్లు చేస్తే, ఆ తర్వాత వివాహాలు జరిగేలా నిబంధనలు పెట్టుకున్న గతంలో కొన్ని సినిమాలు వచ్చాయి. ఇక్కడ అలాంటి ఒక పాయింట్‌ను ప్రధానంగా తీసుకున్నారు. అయితే, ఆ పాయింట్ బాగా కనెక్ట్ అయ్యేలా ఉంది. చివరికి క్లైమాక్స్ వరకు సత్య, గెటప్ శ్రీను , ప్రదీప్ ల కామెడీ కడుపుబ్బా నవ్వించేలా ఉంది.

ఇక నటీనటుల విషయానికి వస్తే, ప్రదీప్ కృష్ణ అనే పాత్రలో ఆకట్టుకున్నాడు. "పక్కవాడు ఎలా పోతే నాకేం" అనుకునే ఒక టిపికల్ మైండ్‌సెట్ ఉన్న కుర్రాడిగా ఇమిడిపోయాడు. రాజా అనే పాత్రలో దీపిక కూడా అలాగే సెట్ అయింది. వీరిద్దరి కాంబినేషన్ కూడా స్క్రీన్ మీద బాగుంది. ఇక సత్యతో పాటు గెటప్ శ్రీను చేసిన హంగామా అంతా ఇంతా కాదు. వీరిద్దరి ట్రాక్ ఆసక్తికరంగా సాగడం సినిమాకి బాగా ప్లస్ అయింది. మురళీధర్ గౌడ్, రోహిణి వంటి వారు తమ పాత్రల పరిధి మేరకు ఆకట్టుకున్నారు.

ఇక టెక్నికల్ టీం విషయానికి వస్తే, రథన్ అందించిన పాటలు ఆకట్టుకునేలా ఉన్నాయి. బ్యాక్‌గ్రౌండ్ స్కోర్ కూడా సినిమాకి తగ్గట్టుగా ఉంది. లొకేషన్స్ ఎక్కడ ప్లాన్ చేశారో తెలియదు, కానీ సినిమాకి తగ్గట్టుగా ఉన్నాయి. నిర్మాణ విలువలు కూడా సినిమా స్థాయికి తగ్గట్టు బాగున్నాయి. నిడివి విషయంలో ఇంకా కేర్ తీసుకుని ఉంటే బాగుండేది. సినిమాటోగ్రఫీ సినిమాకి ప్రధానమైన అసెట్ అనే చెప్పాli.

"అక్కడ అమ్మాయి ఇక్కడ అబ్బాయి" ఒక ఫుల్లీ లోడెడ్ ఫన్ ఎంటర్‌టైనర్.

రేటింగ్: 3/5