Pushpa 2 Breaks OTT Records: నిజంగానే తగ్గేదేలే.. పుష్ప2 ఓటీటీ రైట్స్‌ ఎన్ని కోట్లో తెలుసా.?

Pushpa 2 Breaks OTT Records: పుష్ప సీక్వెల్‌ కోసం కేవలం అల్లు అర్జున్‌ అభిమానులే కాకుండా యావత్‌ ఇండియన్‌ సినిమా ఇండస్ట్రీ వేయి కళ్లతో ఎదురు చూస్తోంది. ఎప్పుడెప్పుడు థియేటర్లలో ఈ సినిమా విడుదలవుతుందా అని ఆతృతతో ఉన్నారు. పుష్ప మొదటి పార్ట్ సాధించిన విజయంతో సహజంగానే సీక్వెల్‌పై అంచనాలు ఏర్పడ్డాయి. ఎర్రచందనం సిండికేట్‌కు నాయకుడిగా మారిన పుష్ప జీవితంలో ఎలాంటి మార్పులు జరిగాయన్న కథాంశంతో పుష్ప ది రూల్ చిత్రాన్ని తెరకెక్కిస్తున్నాడు దర్శకుడు సుకుమార్‌.

ఇక ఈ సినిమాలో అల్లు అర్జున్‌ ఐకాన్‌ డైలాగ్ అయిన తగ్గేదేలే ఈ చిత్రానికి సరిగ్గా సెట్ అయ్యేలా ఉంది. విడుదలకు ముందే పుష్ప2 సరికొత్త రికార్డులను తిరగరాస్తోంది. పాన్‌ ఇండియా రేంజ్‌లో విడుదలవుతోన్న ఈ సినిమా ఇండస్ట్రీ రికార్డులను టార్గెట్ చేస్తోంది. ప్రస్తుతం శరవేగంగా షూటింగ్ జరుపుకుంటున్న ఈ సినిమా షూటింగ్ చివరి దశకు చేరుకుంది. డిసెంబర్ 6వ తేదీన చిత్రాన్ని విడుదల చేసేందుకు సన్నాహాలు చేస్తున్నారు.

ఇదిలా ఉంటే తాజాగా ఈ సినిమా ఓటీటీ హక్కులకు సంబంధించి ఓ ఆసక్తికరమైన వార్త నెట్టింట వైరల్‌ అవుతోంది. ఇప్పటి వరకు ఏ ఇండియన్‌ మూవీకి దక్కని ఘనతను పుష్ప2 సాధించబోతోందని తెలుస్తోంది. ఈ సినిమా ఓటీటీ హక్కులను నెట్‌ఫ్లిక్స్‌ ఏకంగా రూ. 270 కోట్లకు దక్కించుకుందని తెలుస్తోంది. ఇండస్ట్రీలో ఇప్పుడు ఈ అంశంపైనే చర్చ నడుస్తోంది. పుష్ప2పై అంచనాలకు ఇదే నిదర్శనమని బన్నీ ఫ్యాన్స్‌ ఫుల్‌ ఖుషీ అవుతున్నారు.

ఇదిలా ఉంటే ప్రస్తుతం షూటింగ్ చివరి దిశలో ఉన్న పుష్ప2 కొత్త షెడ్యూల్‌ను మరో రెండు రోజుల్లో ప్రారంభించనున్నట్లు తెలుస్తోంది. ఇందులో భాగంగా అల్లు అర్జున్, ఫహాద్ ఫాజిల్‌పై కీలక సన్నివేశాలు చిత్రీకరిస్తారని తెలుస్తోంది. మరి ఈ అంచనాల నడుమ తెరకెక్కుతోన్న పుష్ప2 చిత్రం ఎలాంటి రికార్డ్స్‌ క్రియేట్ చేస్తుందో చూడాలి. కాగా పుష్ప చిత్రానికి మూడో పార్ట్ కూడా ఉంటుందని ఇటీవల రావు రమేశ్‌ తెలపడం కొత్త చర్చకు దారి తీసింది. మరి ఇందులో ఎంత వరకు నిజం ఉందో తెలియాలంటే పుష్ప2 విడుదల వరకు వేచి చూడాలి.