ఖమ్మంలో ఆకట్టుకుంటున్న 40 అడుగుల పీవీ సింధు వాల్‌ ఆర్ట్‌

ఖమ్మంలోని సర్ధార్‌ పటేల్‌ స్టేడియం గోడపై ఓ ప్లేయర్ 40 అడుగుల పెయింటింగ్ ప్రతి ఒక్కరిని ఆకట్టుకుంటుంది. ఖమ్మం జిల్లాకు చెందిన ఇద్దరు ప్లేయన్ పెయింటింగ్ ను గీసి తమ అభిమానాన్ని చాటుకున్నారు. అసలు ఎవరు ఆ ప్లేయర్, పెయింటింగ్ గీసింది ఎవరు అనుకుంటున్నారా... అయితే పూర్తివివరాల్లోకెళదాం..

ఖమ్మం పట్టణానికి చెందిన యువత స్వాతి, విజయ్‌లు మంచి ఆర్టిస్టులు. వారు గోడల మీద వివిధ ఆర్ట్‌లు వేస్తూ తమ అభిరుచిని, ఇష్టాన్ని చాటుతున్నారు. ఇదే తరహాలో ఈ మధ్యకాలంలో ఆ ఇద్దరు యువత ఖమ్మంలోని సర్ధార్‌ పటేల్‌ స్టేడియం గోడపై బ్యాడ్మింటన్‌ స్టార్‌ పీవీ సింధు 40 అడుగుల పెయింటింగ్‌ను వేశారు. అంతే కాదు వారు ఆ పెయింటింగ్ ను తమ ట్విటర్ ఖాతాలో పోస్ట్ చేసారు. దీంతో స్పందించిన పీవీ సింధు వారిని అభినందించింది. వారు పెట్టిన ఆర్ట్ ట్వీట్ ను తాను కూడా తన ట్విట్టర్‌ ఖాతాలో పోస్టు చేస్తూ దానికి ఆర్ట్‌ వేస్తున్న యూట్యూబ్‌ వీడియో లింక్‌ను జత చేసింది. దీంతో నెటిజన్లు లైకులు, కామెంట్లు చేస్తూ స్వాతి, విజయ్‌లను అభినందిస్తున్నారు. ఇప్పుడు ఈ వీడియో, ఫోటో సోషల్ మీడియాలో చక్కర్లు కొడుతుంది.