Kerala CM Convoy: ముఖ్యమంత్రికి తప్పిన ప్రమాదం.. కాన్వాయ్‌లో ఒకదానినొకటి ఢీకొన్న 8 వాహనాలు
Kerala CM Convoy Accident Video: కేరళ సీఎం పినరయి విజయన్ తృటిలో ప్రమాదం నుండి బయటపడ్డారు. సోమవారం రాత్రి కేరళ సీఎం ప్రయాణిస్తోన్న కాన్వాయ్‌లో 8 వాహనాలు ఒకదానినొకటి ఢీకొన్నాయి. ఈ ప్రమాదంలో సీఎం ప్రయాణిస్తున్న కారు కూడా పాక్షికంగా దెబ్బతింది. అదృష్టవశాత్తుగా ఆయనకు ఎలాంటి హానీ లేకుండా ఈ ప్రమాదం నుండి బయటపడ్డారు.
తిరువనంతపురంలో సీఎం కాన్వాయ్‌ వెళ్తుండగా ఉన్నట్లుండి ఒక మహిళ ద్విచక్ర వాహనంపై వెళ్తూ రోడ్డు క్రాస్ చేశారు. ఆమెను ఢీకొనకుండా ఉండటం కోసం కాన్వాయ్‌లో ముందు వెళ్తున్న పైలట్ కారు డ్రైవర్ సడెన్ బ్రేక్ వేశారు. దీంతో సీఎం కాన్వాయ్‌లో వెనుకాల వస్తోన్న ఎస్కార్ట్ వాహనాలన్నీ సడెన్ బ్రేక్ వేయాల్సి వచ్చింది. అలా కార్లన్నీ ఒకదానినొకటి వేగం అదుపు చేసుకోలేక ఢీకొన్నాయి.
వీడియోలో చూస్తే.. కాన్వాయ్‌లో ముందు రెండు తెలుపు రంగు పైలట్ కార్లు వెళ్తున్నాయి. ఆ వెనుకాలె మూడు నలుపు రంగు SUV కార్లు వెళ్తున్నాయి. అందులో మధ్యలో వెళ్తున్న కారులో సీఎం పినరయి విజయన్ కూర్చున్నారు. వాహనాలు ఒకదానినొకటి ఢీకొని ఆగిపోవడంతోనే వెంటనే సీఎం సెక్యురిటీ సిబ్బంది అప్రమత్తమయ్యారు. తమ కార్లలోంచి దిగి సీఎం ఉన్న కారు చుట్టూ భద్రతా వలయంగా ఏర్పడి రక్షణ కవచంగా నిలిచారు. ముందున్న వాహనాలు క్లియర్ అవడంతో మళ్లీ వెంటనే తమ వాహనాలు ఎక్కి ముందుకు సాగిపోయారు. ప్రస్తుతం ఈ వీడియో సోషల్ మీడియాలో వైరల్ అవుతోంది.