Mrunal Thakur reacts to a netizen: సోషల్ మీడియా అందుబాటులోకి వచ్చిన తర్వాత ప్రపంచంలో ఎక్కడ ఏం జరిగినా ఇట్టే తెలిసిపోతోంది. అంతేకాదు సోషల్ మీడియా పుణ్యమా అని హీరోయిన్లు ఇటీవల కాలంలో ట్రోలింగ్ బారినపడుతున్నారు. దీనికి తోడు ఎడిటింగ్, ఫొటో మార్ఫింగ్ వంటి టెక్నాలజీలను కొందరు దుర్వినియోగం చేస్తున్నారు. తాజాగా ఇలాంటి ఘటననే ఎదుర్కొన్నారు బాలీవుడ్ ముద్దుగుమ్మ మృణాల్ ఠాకూర్. ఆ విషయం తన దాకా రావడంతో అతనికి గట్టిగానే సమాధానమిచ్చారు.
ది ఫ్యామిలీ స్టార్ సినిమా పోస్టర్‌ను ఎడిట్ చేసిన ఓ నెటిజన్‌పై హీరోయిన్ మృణాల్ ఠాకూర్ మండిపడ్డారు. దీపావళి పండుగను పురస్కరించుకుని సౌఖిన్ అనే అభిమాని తన ఇన్‌స్టాగ్రామ్‌లో ఓ ఫొటోను పంచుకున్నారు. ఫ్యామిలీ స్టార్ సినిమాలోని మృణాల్ ఫొటోను ఎడిట్ చేశారు. అందులో హీరో విజయ్ దేవరకొండ, మృణాల్‌‌తో క్లోజ్‌గా ఉంటూ దీపావళి సందర్భంగా దివ్వెలు వెలిగించి, పటాకులు కాలుస్తుంటాడు. ఈ ఫొటోలో విజయ్ ఫేస్‌ను ఎడిట్ చేసిన సౌఖిన్ ఆ ప్లేస్‌లో తన ఫోటో పెట్టుకున్నారు.
ఇది కాస్త సోషల్ మీడియాలో వైరల్ అవడంతో మృణాల్ కంట పడింది. అది చూసిన ఆమె అసహనానికి గురయ్యారు. భయ్యా.. మీరు చేసిన పని ఏమైనా బాగుందని అనుకుంటున్నారా? ఇది అస్సలు కరెక్ట్ కాదు అంటూ కామెంట్ పెట్టారు. దీనిపై స్పందించిన నెటిజన్లు మృణాల్‌కు సపోర్టుగా కామెంట్లు పెడుతూ.. అతను చేసిన పనిని తప్పుబడుతున్నారు. దీంతో సోషల్ మీడియాలో ఈ న్యూస్ వైరల్‌గా మారింది.
సీతారామం సినిమాతో ఓవర్ నైట్ స్టార్‌గా మారిపోయింది యంగ్ బ్యూటీ మృణాల్ ఠాకూర్. ఇందులో సాంప్రదాయంగా నటించి ప్రేక్షకుల మనసులో చెరగని ముద్ర వేసుకున్నారు. ఆ తర్వాత హాయ్ నాన్న సినిమాతో మరో బ్లాక్ బస్టర్ హిట్ తన ఖాతాలో వేసుకుని వరుస ఆఫర్లు అందుకుంది. అయితే ఇటీవల మృణాల్, విజయ్‌తో ఫ్యామిలీ స్టార్ చిత్రంలో నటించింది. కానీ ఈ సినిమా బాక్సాఫీసు వద్ద ఆశించినంత హిట్ అందుకోలేకపోయింది. ప్రస్తుతం మృణాల్ పూజా మేరీ జాన్, హై జవానీతో ఇష్క్ హోనా హై, సన్ ఆఫ్ సర్ధార్ 2, తుమ్ హీ హో వంటి చిత్రాల్లో నటిస్తున్నారు.