Benjamin Netanyahu: ఇజ్రాయెల్ ప్రధాని బెంజమిన్ నెతన్యాహు ఇంటిపై బాంబు దాడులు
Benjamin Netanyahu: సిజేరియాలోని ఇజ్రాయెల్ ప్రధాని బెంజమిన్ నెతన్యాహు నివాసంపై దాడి జరిగింది. ఇజ్రాయెల్ అంతర్గత గూఢచార సంస్థ షిన్ బెట్, పోలీసులు శనివారం సాయంత్రం సిజేరియాలోని నెతన్యాహు ప్రైవేట్ నివాసంపై రెండు బాంబులు (ఫైర్‌బాల్‌లు) పేల్చినట్లు తెలిపారు. ఈ బాంబులు ఇంటి ప్రాంగణంలో పడిపోయాయి. ఈ ఘటనలో ఎలాంటి గాయాలు అయినట్లు నివేదికలు లేవని భద్రతా సంస్థలు తెలిపాయి. ఆ సమయంలో నెతన్యాహు, అతని కుటుంబం ఇంట్లో లేరని చెప్పారు. పోలీసులు, షిన్ బెట్ ఘటనపై దర్యాప్తు ప్రారంభించామని కవ్వింపు చర్యగా పేర్కొన్నారు.
ఈ ఘటనకు సంబంధించిన సీసీటీవీ ఫుటేజీ కూడా బయటకు వచ్చింది. నెతన్యాహు ఇంటిపై బాంబులు పడటం స్పష్టంగా కనిపిస్తోంది. ఈ ఘటనను ఇజ్రాయెల్‌లోని అన్ని రాజకీయ పార్టీలు ఖండించాయి. ప్రతిపక్ష నాయకులు యైర్ లాబిడ్ , బెన్నీ గాంట్జ్ ఇద్దరూ ఈ ఘటనను ఖండిస్తూ, బాధ్యులపై చర్యలు తీసుకోవాలని డిమాండ్ చేస్తూ ప్రకటనలు విడుదల చేశారు. ఇజ్రాయెల్ అధ్యక్షుడు ఐజాక్ హెర్జోగ్ ఈ సంఘటనను తీవ్రంగా ఖండించారు . షిన్ బెట్ అధిపతితో మాట్లాడుతూ, ఈ సంఘటనకు బాధ్యులను త్వరగా గుర్తించి, పరిష్కరించాలని పిలుపునిచ్చారు. హెర్జోగ్ ప్రకారం, షిన్ బెట్ చీఫ్ ఇది ప్రమాదకరమైన రెచ్చగొట్టే చర్యగా భావించారు.
అంతకుముందు అక్టోబర్‌లో, లెబనీస్ తీవ్రవాద గ్రూప్ హిజ్బుల్లా డ్రోన్ దాడిలో నెతన్యాహు ఇంటిని లక్ష్యంగా చేసుకుంది. లెబనాన్ నుంచి పంపిన డ్రోన్ సిజేరియాలోని బెంజమిన్ నెతన్యాహు ఇంటి పడకగదిలోకి దూసుకెళ్లింది. అయితే అది లోపలికి వెళ్లలేక పడకగది కిటికీ దగ్గర పేలిపోయింది. కాంపౌండ్‌లో డ్రోన్, గాజు ముక్కలు కనిపించాయి. ఈ ఘటనలో ఎవరూ గాయపడలేదు. ఆ సమయంలో నెతన్యాహు, అతని కుటుంబం ఇంట్లో లేరు. ఈ డ్రోన్ దాడికి హిజ్బుల్లా బాధ్యత వహించింది.