హైదరాబాద్ నగర శివారు ప్రాంతం వాసులకు నిద్ర లేకుండా చేసిన చెడ్డీగ్యాంగ్‌ను రాచకొండ పోలీసులు అరెస్ట్ చేశారు. నెల రోజుల వ్యవధిలో సుమారు ఈ ముఠా ఆరు దోపిడీలకు పాల్పడింది. నిందితుల నుంచి 150 గ్రాముల బంగారం స్వాధీనం చేసుకున్నారు. చెడ్డీ గ్యాంగ్‌లోని ఏడుగురిని రాచకొండ పోలీసులు అరెస్ట్ చేశారు.
ఆ గ్యాంగ్‌ పగటిపూట బొమ్మలు అమ్ముకుంటూ రెక్కీ నిర్వహించి రాత్రి సమయంలో దోపిడీలకు పాల్పడుతోంది. ఈ ముఠాపై హిమాచల్‌ ప్రదేశ్‌, తెలంగాణతో పాటు పలు రాష్ట్రాల్లో మొత్తం 14 కేసులు నమోదయ్యాయి. పశ్చిమ బెంగాల్‌కు చెందిన ఈ ఏడుగురు ముఠా సభ్యుల నుంచి 150 గ్రాముల బంగారం, రూ.3వేలు నగదు,నాలుగు వందల గ్రాముల వెండిని స్వాధీనం చేసుకున్నారు. ప్రస్తుతం మహారాష్ట్ర అకోలాలో నివాసం ఉంటున్న వీరిని టెక్నికల్‌ ఆధారాలతో రాచకొండ పోలీసులు అదుపులోకి తీసుకున్నారు.