ఈమధ్యనే 'భరత్ అనే నేను' సినిమాతో బ్లాక్ బస్టర్ అందుకున్న మహేష్ బాబు ప్రస్తుతం 'మహర్షి' సినిమాతో బిజీగా ఉన్న సంగతి తెలిసిందే. నిజానికి ఈ సినిమా తర్వాత మహేష్ బాబు సుకుమార్ దర్శకత్వంలో ఒక సినిమా చేయాల్సింది. కానీ సుకుమార్ స్క్రిప్ట్ అంతగా నచ్చకపోవడంతో మహేష్ బాబు ఈ సినిమా నుంచి తప్పుకున్నాడు. ఇదే విషయాన్ని మహేష్ బాబు సోషల్ మీడియా ద్వారా తెలుపుతూ సుకుమార్ కు తర్వాత సినిమా కోసం విష్ కూడా చేసాడు.
అయితే మహేష్ బాబు ఎనౌన్స్మెంట్ చేసే ఒక్కరోజు ముందు సుకుమార్ దర్శకత్వంలో స్టైలిష్ స్టార్ అల్లు అర్జున్ ఒక సినిమా చేయబోతున్నట్లు గా అధికారిక ప్రకటన వెలువడింది. అయితే వీరిద్దరి మధ్య గొడవ జరుగుతుందని ప్రేక్షకులు అనుకున్న సమయంలో సుకుమార్ మహేష్ బాబును 'మహర్షి' సెట్స్ పైన కలిశాడు. అయితే తాజా సమాచారం ప్రకారం సుకుమార్ ఇంకా మహేష్ బాబు పై కోపంగానే ఉన్నట్లు తెలుస్తోంది. మరోవైపు 'మహర్షి' సినిమా నిర్మిస్తున్న దిల్ రాజు ఈ సినిమా ప్రీరిలీజ్ కోసం మహేష్ నటించిన 24 సినిమాల దర్శకులను ఆహ్వానించనున్నాడు. ఇంతకుముందు సుకుమార్ మహేష్ బాబు హీరో గా 'వన్ నేనొక్కడినే' సినిమా చేసిన సంగతి తెలిసిందే. మరి దిల్ రాజు ఆహ్వానం మేరకు సుకుమార్ తన కోపం మర్చిపోయి 'మహర్షి' ఈవెంట్ కి వస్తారా లేదా ఇంకా తెలియాల్సి ఉంది.