Tollywood: తెలుగులో అట్టర్‌ ఫ్లాప్‌.. తమిళ్‌లో మాత్రం సూపర్ హిట్‌.. ఆ సినిమా ఏంటో తెలుసా?

Tollywood: ఒక భాషలో హిట్ అయిన సినిమా మరో భాషలో పరాజయం మూట గట్టుకుంటుండొచ్చు. అదే విధంగా ఒక ఇండస్ట్రీలో ఫ్లాప్‌గా నిలిచిన సినిమా మరో ఇండస్ట్రీలో భారీ విజయాన్ని అందుకుంటుండొచ్చు. సినిమా చరిత్రలో ఇలాంటి ఎన్నో సంఘటనలు జరిగాయి. ఆయా భాషల అభిరుచులకు అనుగుణంగా సినిమా జయాపజయాలు ఆధారపడి ఉంటాయి. ఇలాగే తెలుగులో అట్టర్‌ ఫ్లాప్‌గా నిలిచిన ఓ సినిమాను దళపతి విజయ్‌ తమిళ్‌లో తెరకెక్కించి భారీ విజయాన్ని అందుకున్నారు. ఇంతకీ ఏంటా సినిమా.? ఇప్పుడు తెలుసుకుందాం.

దర్శకేంద్రుడు కే. రాఘవేంద్ర రావు తన తనయుడు కోవెలపూడి ప్రకాశ్‌ని హీరోగా పరిచయం చేస్తూ ‘నీతో’ అనే సినిమాను తెరకెక్కించిన విషయం తెలిసిందే. ఈ సినిమాకు జాన్ మహేంద్రన్ దర్శకత్వం వహించాడు. ఇక ఈ సినిమాలో ప్రకాశ్‌కి జోడిగా మహెక్ చాహాల్ నటించింది. అయితే ఈ సినిమా ఆశించిన స్థాయిలో విజయాన్ని అందుకోలేకపోయింది. బాక్సాఫీస్‌ వద్ద ఈ సినిమా భారీ పరాజయాన్ని మూటగట్టుకుంది. ఈ సినిమా తర్వాత ప్రకాశ్‌ ఇండస్ట్రీకి దూరమయ్యారు.

కాగా ఇదే చిత్రాన్ని దళపతి విజయ్‌ తమిళ్‌లో ‘సచిన్’ పేరుతో రీమేక్ చేశాడు. ఈ సినిమాకు కూడా జాన్ మహేంద్రన్ దర్శకత్వం వహించాడు. ఈ చిత్రంలో విజయ్‌కి జోడిగా జెనిలీయా, బిపాసా బసు హీరోయిన్లుగా నటించారు. తెలుగులో నెగిటివ్ టాక్‌ రావడంతో చిన్న చిన్న మార్పులు చేసి తమిళంలో తెరకెక్కించారు. తమిళ్‌లో ఈ సినిమా మంచి టాక్‌ వచ్చింది. ఏకంగా 200 రోజులకు పైగా ఆడడం విశేషం. 2005లో వచ్చిన ఈ సినిమా రూ. 25 కోట్లు రాబట్టడం విశేషం. ఇలా తెలుగులో ఫ్లాఫ్‌ అయిన ఈ సినిమా తమిళ్‌లో భారీ విజయాన్ని నమోదు చేసుకుంది.