గీతా ఆర్ట్స్ బిగ్ ప్లాన్.. సూర్యతో చందూ మొండేటి..

Chandoo Mondeti: నిఖిల్ హీరోగా అనుపమ పరమేశ్వరన్ హీరోయిన్ గా నటించిన "కార్తికేయ 2" సినిమా తో ఈ మధ్యనే పెద్ద సూప‌ర్ హిట్ అందుకున్నాడు డైరెక్టర్ చందూ మొండేటి. ఈ సినిమా సూపర్ సక్సెస్ తో చందూకి భారీ గానే ఆఫ‌ర్లు వ‌చ్చాయి. "కార్తికేయ 3" సినిమా పనులతో ప్రస్తుతం చందు బిజీగా ఉన్నాడు. ఒకవైపు ఈ సినిమా షూటింగ్ ఇంకా మొదలు పెట్టకుండానే ఈ స్టార్ డైరెక్టర్ ఇప్పుడు ప్రముఖ నిర్మాణ సంస్థ గీతా ఆర్ట్స్ తో సినిమా సైన్ చేశాడు. గీతా ఆర్ట్స్ బ్యానర్ లో చందూ మొండేటి కాంబో సెట్ట‌య్యింది.

కానీ ఈ సినిమాకి హీరోనే ఇంకా దొర‌క‌డం లేదు అనుకుంటున్న సమయంలో చందూ ఓ హీరోకి క‌థ చెప్పి, ఒప్పించిన‌ట్టు టాక్‌ వినిపిస్తోంది. ఇంతకీ ఆ హీరో మరెవరో కాదు కోలీవుడ్ స్టార్ హీరో సూర్య‌. స్ట్ర‌యిట్ తెలుగు సినిమా చేయాల‌ని సూర్య ఎప్ప‌టి నుంచో ఎదురు చూస్తున్నారు. అంతేకాకుండా సూర్య "గ‌జిని" సినిమా ని తెలుగులో విడుద‌ల చేసింది గీతా ఆర్ట్స్‌ వారు.

ఆ సినిమా పెద్ద విజ‌యాన్ని అందుకున్న సంగతి తెలిసిందే. అసలు సూర్య‌కు తెలుగులో ఓ మార్కెట్ ని సెట్ చేసింది కూడా ఈ సినిమానే. అందుకే గీతా ఆర్ట్స్‌ బ్యానర్ లో ఓ తెలుగు సినిమా చేయాలని సూర్య ఎప్పటి నుండో ప్లాన్ చేస్తున్నాడు. ఆ ప్రాజెక్ట్ ఇప్పుడు ఇలా చందూతో సెట్ అయ్యింది అని సమాచారం. తెలుగు, త‌మిళ భాష‌ల్లో ఒకేసారి ఈ సినిమాని ప‌ట్టాలెక్కించనున్నారు. త్వరలోనే ఈ సినిమా కి సంబంధించిన అధికారిక ప్ర‌క‌ట‌న మరియు సినిమా గురించిన మరిన్ని వివరాలు తెలియనున్నాయి.