నవోదయ విద్యాలయాల్లో సీబీటీ పరీక్షకు హాల్ టికెట్లు ఆన్ లైన్ లో

దేశవ్యాప్తంగా ఉన్న నవోదయ విద్యాలయాల్లో టీచింగ్, నాన్-టీచింగ్ పోస్టుల నిర్వహించనున్న పరీక్ష (సీబీటీ)లకు సంబంధించిన హాల్‌టికెట్లను నవోదయ విద్యాలయ సమితి విడుదల చేసింది. అధికారిక వెబ్‌సైట్‌లో హాల్‌టికెట్లను అందుబాటులో ఉంచింది. అభ్యర్థులు వెబ్‌సైట్ నుంచి హాల్‌టికెట్లను డౌన్‌లోడ్ చేసుకోవచ్చు. అభ్యర్థులకు హాల్‌టికెట్ డౌన్‌లోడ్‌లో ఏమైనా సమస్యలు ఎదురైతే టోల్ ఫ్రీ నెంబరు: 18002667074 లేదా ఈమెయిల్: navodayavidyalayahelpdesk@gmail.com ద్వారా సంప్రదించాల్సి ఉంటుందని నవోదయ విద్యాలయ సమితి తెలిపింది.

షెడ్యూల్ ఇదీ..

షెడ్యూలు ప్రకారం సెప్టెంబరు 16 నుంచి 20 వరకు పరీక్షలు నిర్వహించనున్నారు. ఆయా తేదీల్లో మూడు షిఫ్టులుగా పరీక్షలు నిర్వహించనున్నారు. అభ్యర్థులు పరీక్ష సమయానికి అరగంట ముందుగా పరీక్ష కేంద్రానికి చేరుకోవాలి. పరీక్ష ప్రారంభమయ్యాక నిమిషం ఆలస్యమైన లోపలికి అనుమతించరు.

దేశవ్యాప్తంగా మొత్తం 2370 టీచింగ్, నాన్ టీచింగ్ పోస్టుల భర్తీకి నవోదయ విద్యాలయ సమితి నోటిఫికేషన్ విడుదల చేసిన సంగతి తెలిసిందే. జులై 10 నుంచి ఆగస్టు 9 వరకు అభ్యర్థుల నుంచి దరఖాస్తులు స్వీకరించారు. ఆగస్టు 12 వరకు ఫీజు చెల్లించారు. దరఖాస్తు చేసుకున్నవారికి సెప్టెంబరు 16 నుంచి పరీక్షలు నిర్వహించనున్నారు. సెప్టెంబరు 20 వరకు పరీక్షలు కొనసాగున్నాయి. ఈ పరీక్షల ద్వారా నవోదయ విద్యాలయాల్లో అసిస్టెంట్ కమిషర్స్, పీజీటీ, టీజీటీ, లీగల్ అసిస్టెంట్, స్టాఫ్‌నర్స్ (ఉమెన్), క్యాటరింగ్ అసిస్టెంట్, లోయర్ డివిజన్ క్లర్క్ పోస్టులను భర్తీ చేయనున్నారు.