కర్ణాటకలో కేంద్ర మంత్రి శ్రీపాద్ నాయక్ కారు ప్రమాదానికి గురైంది. ఉత్తర కన్నడ జిల్లా అంకోలా సమీపంలో జరిగిన ఈ ప్రమాదంలో కేంద్ర మంత్రి శ్రీపాద్ నాయక్ భార్య విజయ, ఆయన పీఏ మృతి చెందారు. శ్రీపాద్ నాయక్ తీవ్రంగా గాయపడ్డారు. శ్రీపాద్ నాయక్ ప్రయాణిస్తున్న కారు కర్ణాటకలోని ఉత్తర కన్నడ జిల్లా అంకుల సమీపంలో బోల్తాపడింది. ఎల్లాపూర్‌ నుంచి గోకర్ణ వెళ్తుండగా ఈ ప్రమాదం జరిగింది. విషయం తెలుసుకున్న వెంటనే పోలీసులు అక్కడికి చేరుకొని సహాయకచర్యలు చేపట్టారు. మెరుగైన వైద్యం కోసం కేంద్రమంత్రిని గోవాలోని బంబోలి ఆస్పత్రికి తరలించారు. మెరుగైన చికిత్స అందేలా చూడాలని గోవా సీఎం ప్రమోద్‌ సావంత్‌ను ప్రధాని మోదీ కోరారు.