Telugu Bigg boss fame Priyanka Jain Prank video: బిగ్ బాస్ ఫేమ్ ప్రియాంక జైన్, బుల్లితెర నటుడు శివకుమార్ ఓ వివాదంలో చిక్కుకున్నారు. తిరుమల శ్రీవారి దర్శనానికి వెళ్లిన ఇద్దరు ఓ ప్రాంక్ వీడియో చేసి విమర్శలపాలయ్యారు. తిరుమల మెట్ల మార్గంలో చిరుత సంచరించే ఏడో మైలు రాయి సమీపంలో లక్ష్మి నరసింహ స్వామి ఆలయం దగ్గర వీరిద్దరూ కలిసి రీల్స్ చేశారు. చిరుత వచ్చిదంటూ ఫేక్ ఆడియో పెట్టి అక్కడి నుంచి పరుగులు తీశారు. ఈ వీడియోను తిరుమల దారిలో చిరుత ఎటాక్? అనే క్యాప్షన్ పెట్టి యూట్యూబ్‌లో అప్‌లోడ్ చేశారు. చివరికి చిరుత లేదు.. అదంతా ప్రాంక్ అని నెటిజన్లను ఫూల్స్ చేశారు.
ప్రస్తుతం ఈ వీడియో సోషల్ మీడియాలో వైరల్‌గా మారింది. దీనిని చూసిన నెటిజన్లు, శ్రీవారి భక్తులు ప్రియాంక జైన్ జంటపై తీవ్ర స్థాయిలో ఆగ్రహం వ్యక్తం చేస్తున్నారు. పవిత్రమైన నడకదారి మార్గంలో ఇలాంటి వీడియోలు చేయడం ఏంటని ప్రశ్నిస్తున్నారు. కేవలం వ్యూస్ కోసం, తిరుమల పవిత్రతను దెబ్బ తీస్తారా అంటూ మండిపడుతున్నారు. భక్తులను భయాందోళనకు గురి చేసే చర్యలకు పాల్పడడంపై ఫైర్ అవుతున్నారు. మరోవైపు ఈ వీడియో ఆధారంగా వారిపై చర్యలు తీసుకునేందుకు టీటీడీ సిద్దమైంది.
జానకి కలగనలేదు, మౌనరాగం వంటి సీరియల్స్‌తో ప్రియాంక జైన్ బాగా ఫేమస్ అయింది. ఇదే క్రమంలో బిగ్ బాస్ తెలుగు సీజన్-7లో అడుగు పెట్టింది. తన ఆట, మాట తీరుతో మెప్పించి ఏకంగా టాప్ 5లో నిలిచింది. బుల్లితెర నటుడు శివకుమార్‌తో ప్రేమలో ఉంది. ఈ క్రమంలో ఈ ప్రేమ జంట రీల్స్, ప్రాంక్ వీడియోలు చేస్తూ తమ యూట్యూబ్ ఛానెల్, ఇన్‌స్టాగ్రామ్‌లో వీడియోలు పంచుకుంటూ అందరినీ ఆకట్టుకునే ప్రయత్నం చేస్తోంది. అందులో భాగంగా చేసిన ప్రయత్నమే ఇలా బెడిసికట్టి ఇప్పుడు నెటిజెన్స్‌తో తిట్లు తింటోంది.