OTT: ఇంట్రెస్టింగ్ కాన్సెప్ట్‌తో 'టీనేజర్స్‌ 17/18'.. ఆహాలో ట్రెండ్‌ అవుతోన్న కొత్త సినిమా

ఓటీటీ ప్లాట్‌ఫామ్స్‌ అందుబాటులోకి వచ్చిన తర్వాత భాషతో సంబంధం లేకుండా మంచి కంటెట్‌ ఉన్న సినిమాలకు ఆదరణ లభిస్తోంది. ముఖ్యంగా ఇతర భాషల్లో మంచి విజయాన్ని అందుకున్న చిత్రాలను తెలుగులో డబ్‌ చేస్తున్నారు మేకర్స్‌. ఈ క్రమంలోనే తాజాగా తొలి తెలుగు ఓటీటీ ఆహా వేదికగా ఓ ఇంట్రెస్టింగ్ మూవీ స్ట్రీమ్‌ అవుతోంది. ప్రస్తుతం ఈ సినిమా రికార్డ్‌ వ్యూస్‌తో దూసుకుపోతోంది. అదే ‘టీనేజర్స్ 17/18’ సినిమా.

కన్నడలో వచ్చిన ‘హడినెలెంటు’కి డబ్బింగ్ వర్షన్‌గా ‘టీనేజర్స్ 17/18’ అనే చిత్రం తెలుగు ఆడియెన్స్‌కి ఆహా లో స్ట్రీమింగ్ అవుతోంది. యథార్థ సంఘటనల ఆధారంగా ఈ చిత్రాన్ని నిర్మించారు. ఫ్యామిలీ అంతా కలిసి చూసేలా ఈ చిత్రం ఉంటుంది. యూత్ ప్రస్తుతం ఎదుర్కొంటున్న సమస్యలను ఇందులో చూపించారు. ఈ చిత్రానికి అంతర్జాతీయంగా ఎన్నో అవార్డులు వచ్చాయి. ఇక ఓటీటీ ఆడియెన్స్‌ను పలకరించేందుకు ఈ చిత్రం వచ్చేసింది. సెప్టెంబర్ 21 నుంచి ఈ సినిమా ఆహాలోకి వచ్చేసింది. హనుమాన్ మీడియా మీద నిర్మాత బాలు చరణ్ ఈ మూవీని ఆహాలోకి తీసుకొచ్చారు.

మెల్ బోర్న్ ఫిల్మ్ ఫెస్టివల్, న్యూయార్క్ ఇండియన్ ఫిల్మ్ ఫెస్టివల్, ఒట్టావా ఇండియన్ ఫిల్మ్ ఫెస్టివల్ ఇలా అనేక జాతీయ, అంతర్జాతీయ వేదికల్లో టీనేజర్స్ చిత్రం అందరినీ ఆకట్టుకుని అవార్డులను సాధించింది. పృథ్వీ కొననూర్ ఈ చిత్రానికి దర్శకత్వం వహించడమే కాకుండా నిర్మించారు. ఇక ఈ చిత్రంలో షెర్లిన్ బోస్లే, నీరజ్ మాథ్యూ, రేఖా కుడ్లిగి, సుధా బెలావుడి, భవానీ ప్రకాష్ వంటి వారు ముఖ్య పాత్రలను పోషించారు. అర్థరాత్రి నుంచి ఈ సినిమా ఆహా వేదికగా స్ట్రీమింగ్ అవుతోంది. మిలియన్ల మినిట్ వ్యూస్‌తో ఈ చిత్రం దూసుకుపోతోంది. ఇప్పటికే ఆహాలో ఈ సినిమా టాప్ 4లోకి వచ్చేసింది. 12 గంటల్లో 15 మిలియన్ మినిట్ వ్యూస్‌తో ఆహాలో ట్రెండ్ అవుతోంది.