Balakrishna: నా కొడుకు మోక్షజ్ఞ వస్తున్నాడు.. నేను విశ్వక్ ట్విన్స్​లానే ఉంటాం..

Gangs of Godavari: విశ్వక్‌ సేన్, నేహాశెట్టి జంటగా అంజలి ముఖ్య పాత్రలో సితార ఎంటర్టైన్మెంట్స్ నిర్మాణంలో కృష్ణ చైతన్య దర్శకత్వంలో తెరకెక్కిన సినిమా ‘గ్యాంగ్స్ ఆఫ్ గోదావరి’. ఈ సినిమా ఈ నెల 31న ప్రేక్షకుల ముందుకు రానుంది. ఈ సందర్భంగా బాలకృష్ణ ముఖ్య అతిథిగా చిత్ర బృందం ప్రీ రిలీజ్‌ ఈవెంట్‌ని మంగళవారం నిర్వహించింది.

బాలకృష్ణ మాట్లాడుతూ.. నా సోదరుడు విశ్వక్ సేన్ గురించి చెప్పాలి. నేను, విశ్వక్ ఒక తల్లి కడుపున పుట్టకపోయినా బయట చూస్తే ఎవరైనా మమ్మల్ని కవలలే అంటారు. సినీ పరిశ్రమలో నేను కొంతమందితోనే చాలా క్లోజ్ గా ఉంటాను. విశ్వక్ సినీ ప్రయాణాన్ని మొదటి నుంచి చూస్తున్నాను. నాలాగే విశ్వక్ కూడా సినిమా సినిమాకి, పాత్ర పాత్రకి కొత్తదనం చూపించడానికి ట్రై చేస్తాడు. ఉడుకు రక్తం, నాలాగే దూకుడుతనం కూడా ఉంది విశ్వక్ లో అని అన్నారు.

‘గ్యాంగ్స్‌ ఆఫ్‌ గోదావరి’ టైటిల్‌లో ఓ వైబ్రేషన్‌ ఉంది. సినిమా కిక్‌ ఇచ్చేలా ఉంది. కృష్ణ చైతన్య గతంలో తెరకెక్కించిన ‘రౌడీ ఫెలో’, ‘ఛల్‌ మోహన్‌ రంగ’ చిత్రాలను ఆదరించినట్టే ఈ సినిమానీ ఆదరిస్తారని కోరుకుంటున్నా. నేహాశెట్టి.. కత్తి, అంజలి.. ఖతర్నాక్‌. ‘డీజే టిల్లు’నే భయపెట్టి రాధికగా ప్రేక్షకుల హృదయాల్లో సుస్థిర స్థానాన్ని సంపాదించుకుంది నేహాశెట్టి. విష్వక్‌కు తన తల్లిదండ్రులే బ్యాక్‌గ్రౌండ్‌. తన తండ్రి జాతకాలు, వాస్తు చూస్తుంటారు. మనల్ని కాపాడేది దైవం. మా అబ్బాయి మోక్షజ్ఞ కూడా భవిష్యత్తులో ఇండస్ట్రీలోకి రావాలి. తను మీ అందరినీ స్ఫూర్తిగా తీసుకోవాలి. నన్ను స్ఫూర్తిగా తీసుకోవద్దని చెబుతుంటా. త్వరలో మా కాంబోలో (విష్వక్‌తో కలిసి) సినిమాని ప్రకటించబోతున్నాం అని అభిమానుల్లో ఆసక్తి రేకెత్తించారు.