IND vs WI: బరువు తగ్గితేనే టీమిండియాలోకి సర్ఫరాజ్ ఖాన్ ఎంట్రీ.. షాకిస్తోన్న బీసీసీఐ అధికారి మాటలు..!

Sarfaraz khan: వెస్టిండీస్‌ పర్యటనకు భారత జట్టును ఇప్పటికే ప్రకటించారు. వచ్చే నెలలో విండీస్ పర్యటనలో రోహిత్ శర్మ సారథ్యంలో టీమిండియా 2 టెస్టులు, 3 వన్డేలు, 5 టీ20 మ్యాచ్‌ల సిరీస్‌ ఆడాల్సి ఉంది. లెజెండ్ సునీల్ గవాస్కర్ నుంచి మాజీ వెటరన్లు ఈ ఎంపికపై పలు విమర్శలు గుప్పించిన సంగతి తెలిసిందే. ముఖ్యంగా దేశవాళీలో అద్భుతంగా రాణిస్తోన సర్ఫరాజ్ ఖాన్ వన్డే, టెస్టు జట్టులో చోటు దక్కించుకోలేకపోవడంతో.. సర్వత్రా విమర్శలు వినిపించాయి. వచ్చే నెల అంటే జులైలో భారత జట్టు వెస్టిండీస్‌ పర్యటనకు వెళ్లాల్సి ఉంది. ఇరు జట్ల మధ్య ఇక్కడ టెస్టు, వన్డే, టీ20 సిరీస్‌లు జరగనున్నాయి. ఈ విండీస్ టూర్ కోసం భారత క్రికెట్ నియంత్రణ మండలి (బీసీసీఐ) వన్డే, టెస్టు జట్టును ప్రకటించింది. ఇందులో పలు ఆశ్చర్యకరమైన పేర్లు తెరపైకి వచ్చాయి.

అయితే ఓ స్టార్ ప్లేయర్‌ని తప్పించడం అందరినీ ఆశ్చర్యానికి గురి చేసింది. ఈ ఆటగాడే సర్ఫరాజ్ ఖాన్. లెజెండ్ సునీల్ గవాస్కర్ వంటి మాజీ వెటరన్లు సర్ఫరాజ్‌కు చోటు దక్కలేదని విమర్శించారు. అయితే ఇప్పుడు ముంబై బ్యాట్స్‌మెన్ పేలవమైన ఫిట్‌నెస్, క్రమశిక్షణ లేకపోవడమే ఈ నిర్ణయం వెనుక పెద్ద కారణమని బీసీసీఐ వర్గాలు పేర్కొన్నాయి.

ఫస్ట్ క్లాస్ క్రికెట్‌లో 79.65 సగటుతో పరుగులు..

కుడిచేతి వాటం బ్యాట్స్‌మెన్ సర్ఫరాజ్ గత మూడు సీజన్లలో రంజీ ట్రోఫీలో 2566 పరుగులు చేశాడు. అతను తన కెరీర్‌లో ఫస్ట్ క్లాస్ క్రికెట్‌లో 37 మ్యాచ్‌లలో 79.65 సగటుతో పరుగులు సాధించాడు. ఇలాంటి పరిస్థితుల్లో అండర్-19 ప్రపంచకప్‌లో దేశానికి రెండుసార్లు ప్రాతినిధ్యం వహించిన ఆటగాడికి టీమిండియాలో చోటు కల్పించకపోవడంపై ప్రశ్న తలెత్తుతోంది.

రితురాజ్ గైక్వాడ్ భారత జట్టులో ఎంపికయ్యాడు. అతని ఫస్ట్ క్లాస్ క్రికెట్ కెరీర్ సగటు 42కి దగ్గరగా ఉంది. జట్టు ఎంపికతో సంబంధం ఉన్న BCCI అధికారి వార్తా సంస్థ PTIతో మాట్లాడుతు.. "సర్ఫరాజ్ పదే పదే విస్మరించబడటానికి కారణం క్రికెట్ మాత్రమే కాదని నేను చెప్పగలను. వారు ఎంపిక కాకపోవడానికి అనేక కారణాలున్నాయి" అంటూ చెప్పుకొచ్చాడు.

'ఫిట్‌నెస్‌ పై ఫోకస్ చేయాలి'

"వరుసగా రెండు సీజన్లలో 900+ పరుగులు చేసిన ఆటగాడిని పట్టించుకోకుండా సెలెక్టర్లు తప్పు చేశారు?" అంటూ మాజీలు విమర్శలు గుప్పించారు. అంతర్జాతీయ స్థాయిలో అతని ఫిట్‌నెస్ జట్టులో ఎంపిక కాకపోవడం వెనుక ప్రధాన కారణాలలో ఒకటిగా చెబుతున్నారు. ఈ విషయంలో సర్ఫరాజ్ తీవ్రంగా శ్రమించాల్సి ఉంటుందని, బరువు తగ్గించుకుని మరింత ఫిట్ నెస్ తో తిరిగి రావాలని కోరుతున్నారు. బ్యాటింగ్ ఫిట్‌నెస్ మాత్రమే ఎంపికకు ప్రమాణం కాదంటూ చెబుతున్నారు.

BCCI అధికారి ప్రకారం, ఫిట్‌నెస్‌తో పాటు, మైదానం లోపల, వెలుపల సర్ఫరాజ్ వైఖరి కూడా క్రమశిక్షణ ప్రమాణాలకు అనుగుణంగా లేదు. "మైదానంలో, వెలుపల అతని ప్రవర్తన అత్యున్నతమైనది కాదు. క్రమశిక్షణ దృష్ట్యా ఆయన కొన్ని మాటలు, కొన్ని వ్యక్తీకరణలు బాగోలేదు. సర్ఫరాజ్ తన తండ్రి, కోచ్ నౌషాద్ ఖాన్‌తో కలిసి ఈ అంశాలపై పని చేస్తారని భావిస్తున్నారు.

ఈ ఏడాది ఆరంభంలో ఢిల్లీతో జరిగిన రంజీ మ్యాచ్‌లో ఢిల్లీపై సెంచరీ సాధించిన తర్వాత సర్ఫరాజ్ దూకుడుగా సంబరాలు చేసుకోవడం సెలెక్టర్లకు చిరాకు తెప్పించిందని భావిస్తున్నారు. ఆ సమయంలో అప్పటి సెలక్షన్ కమిటీ చీఫ్ చేతన్ శర్మ స్టేడియంలో ఉన్నారు. అంతకుముందు, 2022 రంజీ ట్రోఫీ ఫైనల్‌లో అతని ప్రవర్తనపై మధ్యప్రదేశ్ కోచ్, మాజీ ముంబై లెజెండ్ చంద్రకాంత్ పండిట్‌ ఆగ్రహం వ్యక్తం చేశాడు.

ఇప్పుడు జట్టులో చోటు దక్కించుకోవడం కష్టమే..

ఐపీఎల్‌లో అతని పేలవ ప్రదర్శన, షాట్ బాల్ ముందు అతని బలహీనతతోనే అలాంటి నిర్ణయం తీసుకోవాల్సి వచ్చిందా అని అడిగినప్పుడు.. ఆయన మాట్లాడుతూ, 'ఇది మీడియా సృష్టించిన అభిప్రాయం. మయాంక్ అగర్వాల్ భారత టెస్ట్ జట్టులోకి వచ్చినప్పుడు, అతను ఒకే సీజన్‌లో ఫస్ట్ క్లాస్ క్రికెట్‌లో దాదాపు 1000 పరుగులు చేశాడు. MSK ప్రసాద్ కమిటీ అతని IPL రికార్డును పరిశీలించిందా? హనుమ విహారి విషయంలోనూ అదే జరిగింది. దేశవాళీ క్రికెట్ ఆడిన తర్వాత జాతీయ జట్టులోకి కూడా వచ్చాడు.

సర్ఫరాజ్‌కు ఇప్పుడు జట్టులో చోటు దక్కడం మరింత కష్టమని బీసీసీఐ అధికారి తెలిపారు. గైక్వాడ్‌తో పాటు, సూర్యకుమార్ యాదవ్ కూడా జట్టులో స్థానం కోసం పోటీదారులుగా ఉన్నారు. శ్రేయాస్ అయ్యర్ గాయం నుంచి కోలుకుంటే, అతను తిరిగి జట్టులోకి వస్తాడనే వాదన కూడా బలపడుతుంది.

వెస్టిండీస్ పర్యటనకు భారత జట్టు..

టెస్టు జట్టు: రోహిత్ శర్మ (కెప్టెన్), శుభమన్ గిల్, రితురాజ్ గైక్వాడ్, విరాట్ కోహ్లీ, యశస్వి జైస్వాల్, అజింక్యా రహానే (వైస్ కెప్టెన్), కెఎస్ భరత్ (వికెట్ కీపర్), ఇషాన్ కిషన్ (వికెట్ కీపర్), ఆర్.కె. అశ్విన్, రవీంద్ర జడేజా, శార్దూల్ ఠాకూర్, అక్షర్ పటేల్, మహ్మద్ సిరాజ్, ముఖేష్ కుమార్, జయదేవ్ ఉనద్కత్, నవదీప్ సైనీ.

వన్డే జట్టు: రోహిత్ శర్మ (కెప్టెన్), శుభ్‌మన్ గిల్, రీతురాజ్ గైక్వాడ్, విరాట్ కోహ్లీ, సూర్యకుమార్ యాదవ్, సంజు శాంసన్ (వికెట్ కీపర్), ఇషాన్ కిషన్ (వికెట్ కీపర్), హార్దిక్ పాండ్యా (వైస్ కెప్టెన్), శార్దూల్ ఠాకూర్, రవీంద్ర జడేజా, అక్షర్ పటేల్జా యుజ్వేంద్ర చాహల్, కుల్దీప్ యాదవ్, జయదేవ్ ఉనద్కత్, మహ్మద్ సిరాజ్, ఉమ్రాన్ మాలిక్, ముఖేష్ కుమార్.