TG TET 2024 Results: తెలంగాణ టెట్ ఫలితాలు విడుదల.. టెట్‌, డీఎస్సీ దరఖాస్తుదారులకు గుడ్‌న్యూస్‌..

TG TET 2024 Results: తెలంగాణ టీచర్‌ ఎలిజిబిలిటీ టెస్ట్ (TET 2024) ఫలితాలు నేడు విడుదలయ్యాయి. సీఎం రేవంత్ రెడ్డి చేతుల మీదగా బుధవారం మధ్యాహ్నం టెట్-2024 ఫలితాలను విడుదల చేశారు. మొత్తం 2,86,381 మంది అభ్యర్థులు ఇందుకోసం దరఖాస్తు చేసుకున్నారని అధికారులు తెలిపారు. పేపర్-1పరీక్షకు 85,996 అభ్యర్థులు హాజరు కాగా 57,725 మంది ఉత్తీర్ణులయ్యారని పేర్కొన్నారు. పేపర్‌-2కు 1,50,491 మంది హాజరయ్యారని, వారిలో 51,443 అభ్యర్థులు అర్హత సాధించారని అధికారులు తెలిపారు. పరీక్షకు హాజరైన అభ్యర్ధులు అధికారిక వెబ్‌సైట్‌లో ఫలితాలు చెక్‌ చేసుకోవచ్చు.

ఈ సందర్భంగా అభ్యర్థులకు ఉపశమనం కలిగించేందుకు రాష్ట్ర ప్రభుత్వం కీలక నిర్ణయం తీసుకుంది. టెట్-2024లో అర్హత సాధించని వారికి వచ్చే టెట్‌కు ఉచితంగా దరఖాస్తు చేసుకునే వెలుసుబాటు కల్పించింది. అదేవిధంగా ఇప్పుడు అర్హత సాధించిన వారికి ఒకసారి ఉచితంగా డీఎస్సీకి దరఖాస్తు చేసుకునే అవకాశాన్ని ప్రభుత్వం ఇచ్చింది. ఎన్నికల కోడ్‌ వల్ల టెట్‌-2024 దరఖాస్తు ఫీజులను ప్రభుత్వం తగ్గించలేకపోయింది. దీంతో తదుపరి టెట్‌, డీఎస్సీ దరఖాస్తుదారులకు ఉపశమనం కలిగించింది.

కాగా తెలంగాణ టెట్‌ అర్హత కాలపరిమితి జీవితకాలం ఉంటుంది. ఈ టెట్‌ పేపర్ -1లో ఉత్తీర్ణులైన వారు ఒకటి నుంచి ఐదో తరగతి వరకు బోధించే ఎస్జీటీ పోస్టులకు అర్హులవుతారు. పేపర్‌-2లో ఉత్తీర్ణులైన అభ్యర్థులు ఆరు నుంచి 8వ తరగతి వరకు బోధించే స్కూల్ అసిస్టెంట్ ఉద్యోగాలకు అర్హతలవుతారు. తెలంగాణలో ఉపాధ్యాయ నియామకాల కోసం మెగా డీఎస్సీ నోటిఫికేషన్ ఇప్పటికే విడుదలైన సంగతి తెలిసిందే. జూలై మాసంలో ఇందుకు సంబంధించిన పరీక్షలు జరగనున్నాయి.

రిజల్ట్స్ కోసం ఇక్కడ క్లిక్‌ చేయండి