పార్టీ ఫిరాయించిన ఎమ్మెల్యేలపై తెలంగాణ హైకోర్టు కీలక ఆదేశాలు

Telangana High Court: పార్టీ మారిన ఎమ్మెల్యేలపై నాలుగు వారాల్లో చర్యలు తీసుకోవాలని తెలంగాణ హైకోర్టు సోమవారం ఆదేశాలు జారీ చేసింది. కాంగ్రెస్ లో చేరిన ఎమ్మెల్యేలపై చర్యలు తీసుకోవాలని కోరుతూ బీఆర్ఎస్ హైకోర్టును ఆశ్రయించింది. ఈ పిటిషన్ పై విచారణ నిర్వహించిన ఉన్నత న్యాయస్థానం తీర్పును వెల్లడించింది. ఈ ఏడాది మేలో జరిగిన పార్లమెంట్ ఎన్నికలకు ముందు బీఆర్ఎస్ ఎమ్మెల్యేలు దానం నాగేందర్, కడియం శ్రీహరి, తెల్లం వెంకట్రావులు కాంగ్రెస్ లో చేరారు.

ఈ ఏడాది ఏప్రిల్ 7న తెల్లం వెంకట్రావు, అంతకు ముందు నెల అంటే మార్చి 31న మాజీ డిప్యూటీ సీఎం కడియం శ్రీహరి, ఈ ఏడాది జూన్ 21న మాజీ మంత్రి పోచారం శ్రీనివాస్ రెడ్డి , జూన్ 24న జగిత్యాల ఎమ్మెల్యే సంజయ్ కాంగ్రెస్ పార్టీలో చేరారు. ఈ ఏడాది మార్చి 17న ఖైరతాబాద్ ఎమ్మెల్యే దానం నాగేందర్ కాంగ్రెస్ లో చేరికతో బీఆర్ఎస్ నుంచి ఆ పార్టీ ఎమ్మెల్యేల వలస ప్రారంభమైంది. మరికొందరు ఎమ్మెల్యేలు కూడా వలస వెళ్లే అవకాశం ఉందని ప్రచారం సాగింది. అయితే ఈ వలసలకు బ్రేక్ పడింది. ఈ బ్రేక్ తాత్కాలిక బ్రేక్ అని కాంగ్రెస్ పార్టీ వర్గాలు చెబుతున్నాయి.

కాంగ్రెస్ పార్టీలో చేరిన ఎమ్మెల్యేలపై అనర్హత వేటేయాలని స్పీకర్ కు వినతి పత్రం సమర్పించారు. అయితే ఈ పిటిషన్ పై స్పీకర్ ఎలాంటి చర్యలు తీసుకోవడం లేదని... ఈ విషయమై స్పీకర్ కు ఆదేశాలివ్వాలని కోరుతూ హైకోర్టులో ఆ పార్టీ ఎమ్మెల్యేలు కౌశిక్ రెడ్డి, కేపీ వివేకానందలు పిటిషన్ దాఖలు చేశారు. ఈ పిటిషన్ పై ఇరువర్గాల వాదనలు విన్న తర్వాత హైకోర్టు తీర్పును వెలువరించింది. నాలుగు వారాల్లో పార్టీ ఫిరాయించిన ఎమ్మెల్యేలపై చర్యలు తీసుకోవాలని అసెంబ్లీ సెక్రటరీని ఆదేశించింది. స్పీకర్ చర్యలు తీసుకోకపోతే సుమోటోగా తీసుకొని కేసు విచారిస్తామని హైకోర్టు తెలిపింది.