ప్రమాదం పొంచి ఉంది..అప్రమత్తత అవసరం..ఆరోగ్యశాఖా మంత్రి ఈటెల రాజేందర్

కరోనా ముప్పు పూర్తిగా తొలిగిపోలేదు. ఇటీవల దసరా.. బతుకమ్మ పండుగల నేపధ్యంలో ప్రజలు పెద్ద ఎత్తున బయటకు వచ్చారు. ఒక్క దగ్గర చేరి పండగలు నిర్వహించుకున్నారు. ఈ నేపధ్యంలో కేసుల సంఖ్యా పెరిగే అవకాశం ఉందని వైద్య ఆరోగ్య శాఖ అంచనా వేస్తోంది. అదీ కాకుండా శీతాకాలం మొదలవడంతో కరోనా వైరస్ తీవ్రత పెరిగే అవకాశం ఉందనీ భావిస్తోంది. ఈ క్రమంలో ఈరోజు ఆరోగ్య శాఖా మంత్రి ఈటెల రాజేందర్ వైద్య ఆరోగ్య శాఖ అధికారులతో సుదీర్ఘంగా సమీక్ష జరిపారు.

కరోనా మళ్ళీ వ్యాపించే అవకాశం ఉన్నందున ప్రజలను మాస్కుల వినియోగం, సానిటైజర్ వినియోగం పై మరింతగా అప్రమ్మత్తం చేయాలనీ మంత్రి ఈ సందర్భంగా విద్యాశాఖ అధికారులకు సూచించారు. ప్రస్తుతం అదుపులోనే కరోనా వ్యాప్తి ఉన్నప్పటికీ అలసత్వం పనికిరాదనీ..అప్రమత్తంగా ఉండాలనీ చెప్పారు. అదేవిధంగా మెరికా, యూరప్ దేశాలలో కేసులు పెరుగుదల.. దేశంలోనూ ఢిల్లీ, కేరళలో కేసులు పెరుగుతున్న తీరుపై సమావేశంలో చర్చించారు.

ఇక వ్యాక్సిన్​పై విస్తృత ప్రయోగాలు జరుగుతున్న నేపథ్యంలో వ్యాక్సిన్ అందుబాటులోకి వస్తే ప్రజలందరీ అందేలా ముందస్తు చర్యలు చేపట్టాలని ఆదేశించారు. ప్రభుత్వ ఆస్పత్రుల్లో మందులు , ఆక్సిజన్ సరఫరాకు ఆటంకం లేకుండా చూడాలని స్పష్టం చేశారు. వైద్య ఆరోగ్య శాఖ సిబ్బంది ... పట్టణాల్లో మున్సిపల్ శాఖ అధికారులతో, గ్రామాలలో పంచాయతీరాజ్ శాఖ అధికారులతో సమన్వయం చేసుకుంటూ ముందుకు సాగాలని సూచించారు.