Revanth Reddy: రేవంత్‌రెడ్డి ప్రమాణ స్వీకారానికి ఎల్బీ స్డేడియంలో భారీ ఏర్పాట్లు

Revanth Reddy: తెలంగాణ సీఎంగా అనుముల రేవంత్ రెడ్డి ప్రమాణ స్వీకారానికి భారీ ఏర్పాట్లు చేశారు అధికారులు... రేపు మధ్యాహ్నం ఎల్బీ స్డేడియంలో ఒంటి గంటా 04 నిమిషాలకు ముఖ్యమంత్రిగా రేవంత్‌రెడ్డి ప్రమాణ స్వీకారం చేయనున్నారు. ఈ సందర్భంగా ఏర్పాటు చేసిన సభలో ఆరు గ్యారెంటీలపై రేవంత్ తొలి సంతకం చేయనున్నారు. ఈ ప్రమాణ స్వీకారానికి కాంగ్రెస్ పార్టీ అధినేత్రి సోనియా గాంధీ, రాహుల్, ప్రియాంక హాజరుకానున్నారు.

ఎల్బీ స్టేడియంలో మూడు స్టేజీలు నిర్మిస్తున్నారు. ప్రధాన స్టేజీకి ఇరువైపులా రెండు వేదికలు ఏర్పాటు చేశారు. ప్రధాన వేదికపై రేవంత్‌రెడ్డి ప్రమాణ స్వీకారం చేస్తారు. ప్రధాన వేదికకు ఎడమ వైపు 63 సీట్లతో ఎమ్మెల్యేల కోసం వేదిక ఏర్పాటు చేయగా.. కుడి వైపు వీవీఐపీల కోసం 150 సీట్లతో వేదిక ఏర్పాటు చేశారు అధికారులు.

తెలంగాణ సంస్కృతి సాంప్రదాయాలు ఉట్టిపడేలా.. 500 మందితో సాంస్కృతిక కార్యక్రమాలు నిర్వహించనున్నారు. అమరవీరుల కుటుంబాల కోసం 300 సీట్లతో ప్రత్యేక గ్యాలరీ ఉంటుంది. మేధావులు, ఉద్యమకారుల కోసం 250 సీట్లతో మరో గ్యాలరీ ఏర్పాటు చేశారు. 30 వేల మంది సాధారణ ప్రజలు కూర్చునే విధంగా ఏర్పాట్లు చేశారు. స్టేడియం బయట ప్రజలు ప్రమాణ స్వీకార కార్యక్రమాన్ని వీక్షించేందుకు భారీ ఎల్ఈడీ స్క్రీన్లు కూడా ఏర్పాటు చేశారు.