హస్తినాపురం చౌరస్తాలో సీఎం కేసీఆర్ దిష్టిబొమ్మ దహనం

Sama Ranga Reddy: మునుగోడులో బీజేపీ గెలుస్తోందని ఇంటెలిజెన్స్ నివేదికలు రావడంతో టీఆర్ఎస్ కొత్త డ్రామాకు తెరలేపిందని బీజేపీ రంగారెడ్డి జిల్లా అధ్యక్షుడు సామ రంగారెడ్డి అన్నారు. బీజేపీపై టీఆర్ఎస్ చేస్తున్న ఆరోపణలను వ్యతిరేకిస్తూ తెలంగాణ చౌరస్తా నుంచి హస్తినాపురం చౌరస్తా వరకు ర్యాలీగా వచ్చి చౌరస్తాలో బీజేపీ నాయకులతో కలిసి సీఎం కేసీఆర్ దిష్టిబొమ్మ దహనం చేశారు. ఈ సందర్భంగా ఆయన మాట్లాడారు. ఓటమి భయంతోనే ప్రజలను పక్కదారి పట్టించేందుకు నలుగురు ఎమ్మెల్యేలను కొనడానికి బీజేపీ బేరాలు చేసిందంటూ ప్రచారం చేస్తున్నారన్నారు.

బీజేపీకి ఎమ్మెల్యేలను కొనాల్సిన అవసరం లేదని, పార్టీ సిద్దాంతాలు నచ్చిన వారు స్వయంగా వస్తారని ఆ‍యన అన్నారు. కాంగ్రెస్‌లో గెలిచిన 12 మంది ఎమ్మెల్యేలను టీఆర్ఎస్ పార్టీ కొనుక్కుని వారికి మంత్రి పదవులు ఇచ్చిందని ఆరోపించారు. బీజేపీకి ఆ రంగు పూసే ప్రయత్నం చేయొద్దన్నారు. ఎదేమైనా మునుగోడులో బీజేపీ గెలవడం ఖాయమన్నారాయన. కార్యక్రమంలో బీజేపీ కార్పొరేటర్లు మొద్దు లచ్చిరెడ్డి, బద్దం ప్రేమ్ మహేశ్వర్ రెడ్డి, వెంకటేశ్వర్ రెడ్డి, బీజేపీ శ్రేణులు పాల్గొన్నారు.