Siraj: ఇకపై డీఎస్పీగా మహ్మద్ సిరాజ్.. కివీస్ సిరీస్‌కు ముందే గుడ్‌న్యూస్ చెప్పిన ప్రభుత్వం..

DSP Mohammed Siraj: రోహిత్ శర్మ కెప్టెన్సీలో ఐసీసీ టీ20 వరల్డ్ కప్ 2024 టైటిల్ గెలిచి ఇంటికి తిరిగి వచ్చిన సిరాజ్‌కు ఘన స్వాగతం లభించింది. అప్పటి నుంచి ఛాంపియన్‌గా నిలిచిన సిరాజ్‌ను తెలంగాణ రాష్ట్ర ప్రజలతోపాటు హైదరాబాద్ నగర ప్రజలందరూ అభినందించారు. అయితే, ఇప్పుడు న్యూజిలాండ్‌తో మూడు మ్యాచ్‌ల టెస్ట్ సిరీస్‌కు ముందు, సిరాజ్‌కు తెలంగాణ రాష్ట్ర తెలంగాణ పోలీస్‌లో డిప్యూటీ సూపరింటెండెంట్ ఆఫ్ పోలీస్ (డీఎస్‌పీ) పదవిని ప్రదానం చేశారు. ఈ మేరకు తెలంగాణ పోలీసులు సమాచారం అందించారు.

సిరాజ్ డీఎస్పీ అయ్యాడు..

డీఎస్పీగా బాధ్యతలు స్వీకరించిన తర్వాత టీమ్ ఇండియా ఫాస్ట్ బౌలర్ సిరాజ్ రాష్ట్ర ముఖ్యమంత్రి రేవంత్ రెడ్డికి కృతజ్ఞతలు తెలిపాడు. సిరాజ్ ప్రపంచ ఛాంపియన్‌ అయిన వెంటనే, రాష్ట్ర ప్రభుత్వం ప్రభుత్వ ఉద్యోగాలు కల్పిస్తామని ప్రకటించింది. ఈ హామీని నెరవేర్చిన ప్రభుత్వం ఇప్పుడు సిరాజ్‌కు ఈ కీలక పదవిని కట్టబెట్టింది. అయితే, సిరాజ్ ఉద్యోగం అతని క్రికెట్‌పై ప్రభావం చూపదు. అతను టీమిండియా కోసం క్రికెట్ ఆడుతూనే ఉంటాడు.

సిరాజ్‌కు ఇంటి స్థలం కూడా..

సిరాజ్‌కు ఉద్యోగంతో పాటు ఇంటి స్థలం కూడా ఇస్తామని ప్రభుత్వం హామీ ఇచ్చింది. మీడియా కథనాల ప్రకారం, హైదరాబాద్‌లో ఇల్లు నిర్మించుకోవడానికి భూమిని కూడా అందించింది. టీమిండియాలో తెలంగాణ రాష్ట్రం ప్రపంచ ఛాంపియన్‌గా నిలిచిన ఏకైక ఆటగాడి సిరాజ్ నిలిచిన సంగతి తెలిసిందే.

అక్టోబర్ 16 నుంచి రంగంలోకి సిరాజ్..

టీమిండియా ఫాస్ట్ బౌలర్ సిరాజ్.. ఇప్పుడు భారత్-న్యూజిలాండ్ మధ్య జరిగే మూడు మ్యాచ్‌ల టెస్ట్ సిరీస్‌లో ఆడబోతున్నాడు. అక్టోబర్ 16 నుంచి భారత్, న్యూజిలాండ్ మధ్య తొలి టెస్టు మ్యాచ్ జరగనుంది. కాగా, మూడు మ్యాచ్‌ల సిరీస్ తర్వాత, సిరాజ్ టెస్ట్ టీమ్ ఇండియాతో కలిసి ఆస్ట్రేలియా పర్యటనకు బయలుదేరనున్నాడు. నవంబర్ 22 నుంచి ఆస్ట్రేలియాలో భారత్ తన తొలి టెస్టు మ్యాచ్ ఆడనుంది.