IPL 2024: నేటి నుంచి ఐపీఎల్‌ టోర్నీ.. మొదటి పోరులో చెన్నైతో బెంగళూరు ‘ఢీ’

IPL 2024: చెన్నై వేదికగా నేడు ఐపీఎల్‌ 17వ సీజన్‌ మొదలు కానుంది. గత ఏడాదిలాగే 10 జట్లు 74 మ్యాచ్‌లతో టోర్నీ సిద్ధం కాగా.... ఎన్నికల కారణంగా తొలి దశలో 21 మ్యాచ్‌లకే బీసీసీఐ షెడ్యూల్‌ ప్రకటించింది. గత కొద్ది రోజులుగా భారత టెస్టు క్రికెట్‌ను ఆస్వాదించిన ఫ్యాన్స్‌ రాబోయే దాదాపు ఎనిమిది వారాల పాటు బౌండరీల గురించే చర్చించడం ఖాయం.

మెగా టీ-20 టోర్నీ ఐపీఎల్‌–2024కు రంగం సిద్ధమైంది. ఎంఎ చిదంబరం స్టేడియంలో నేడు జరిగే తొలి మ్యాచ్‌లో డిఫెండింగ్‌ చాంపియన్‌ చెన్నై సూపర్‌ కింగ్స్‌ తో రాయల్‌ చాలెంజర్స్‌ బెంగళూరు తలపడుతుంది. గత రెండు సీజన్ల తరహాలోనే ప్రతీ జట్టు 14 మ్యాచ్‌ల చొప్పున ఆడుతుంది.

లీగ్‌ దశలో 70 మ్యాచ్‌లు, 4 ప్లే ఆఫ్స్‌ మ్యాచ్‌లు ఉంటాయి. తుది షెడ్యూల్‌ ప్రకటించకపోయినా... మే 26న ఫైనల్‌ జరిగే అవకాశం ఉంది. ఇప్పటి వరకు జరిగిన 16 సీజన్లలో చెన్నై, ముంబై ఐదేసిసార్లు విజేతగా నిలవగా కోల్‌కతా 2 సార్లు టైటిల్‌ సాధించింది.

దక్కన్‌ చార్జర్స్, సన్‌రైజర్స్‌ హైదరాబాద్, రాజస్తాన్‌ రాయల్స్, గుజరాత్‌ టైటాన్స్‌ జట్ల ఖాతాలో ఒక్కో ట్రోఫీ చేరాయి. చెపాక్‌ మైదానంలో మొదటి మ్యాచ్‌కు ముందు ప్రత్యేక ఆరంభోత్సవ వేడుకలు జరుగుతాయి. తాజా సీజన్‌లో పలు జట్లకు కొత్త కెప్టెన్లు వచ్చారు. ముంబైకి రోహిత్‌ స్థానంలో పాండ్యా, హైదరాబాద్‌కు మార్క్‌రమ్‌ స్థానంలో కమిన్స్, చెన్నైకి ధోని స్థానంలో రుతురాజ్‌ గైక్వాడ్, గుజరాత్‌కు పాండ్యా స్థానంలో శుబ్‌మన్‌ గిల్‌ బాధ్యతలు చేపడుతున్నారు. గాయం నుంచి కోలుకొని వచ్చిన రిషభ్‌ పంత్, శ్రేయస్‌ అయ్యర్‌ మళ్లీ ఢిల్లీ, కోల్‌కతా జట్ల పగ్గాలు చేపట్టారు. మిగతా నలుగురు కేఎల్‌ రాహుల్‌, సంజూ సామ్సన్‌, డుప్లెసిస్‌, శిఖర్‌ ధావన్‌లు గత సీజన్‌లాగే ఈసారి సారథులుగా కొనసాగనున్నారు.

ఎనిమిది జట్ల హోం వేదికల్లో ఎలాంటి మార్పు లేకపోగా... ఢిల్లీ తమ తొలి రెండు మ్యాచ్‌లను విశాఖపట్నంలో ఆడుతుంది. పంజాబ్‌ కింగ్స్‌ ఈసారి మొహాలిలో కాకుండా కొత్తగా ముల్లన్‌పూర్‌లో కట్టిన స్టేడియాన్ని తమ హోం గ్రౌండ్‌గా మార్చుకుంది. ఈ సీజన్‌లో కొత్తగా రెండు నిబంధనలు వచ్చాయి. ఒక ఓవర్లో రెండు బౌన్సర్లను అనుమతిస్తారు. చెలరేగిపోతున్న బ్యాటర్లను కొంత వరకు నిలువరించేందుకు పేస్‌ బౌలర్లకు ఇది ఒక అదనపు బలంగా పనికొస్తుంది. స్మార్ట్‌ రీప్లే’ సిస్టంను కూడా తొలిసారి అమలు చేస్తున్నారు. దీని ద్వారా అంపైర్‌ రివ్యూ ఫలితాలను మరింత వేగంగా, కచ్చితంగా అందించే అవకాశం ఉంటుంది. టీవీ అంపైర్, హాక్‌ ఐ ఆపరేటర్‌ కలిసి ఒకే చోట కూర్చునే ఏర్పాటు చేయడం వల్ల ఇది సాధ్యమవుతుంది. గత సీజన్‌లో అమల్లోకి వచ్చిన ‘ఇంపాక్ట్‌ ప్లేయర్‌’ నిబంధన ఈసారి కూడా కొనసాగుతుంది.