Viral: పానిపూరీ ఇష్టంగా తింటున్నారా? ఈ వీడియో చూస్తే గుండె జల్లుమనాల్సిందే

Insects in Pani puri: పానిపూరీని చాలా మంది ఎంతో ఇష్టంగా తింటుంటారు. సాయంత్రం అయ్యిందంటే పాని పూరీ బండ్ల దగ్గర క్యూ కడుతుంటారు. ఎన్ని రకాల స్ట్రీట్ ఫుడ్స్‌ అందుబాటులో ఉన్నా పానిపూరీకి ఉండే క్రేజే వేరని ప్రత్యేకంగా చెప్పాల్సిన పనిలేదు. మరీ ముఖ్యంగా అమ్మాయిలు పానిపూరి అంటే చెవి కోసుకుంటారు. నిజానికి పానిపూరీ రుచి కూడా అలాగే ఉంటుంది.

అయితే కొందరు పానిపూరి నిర్వాహకులు మాత్రం శుభ్రతను అస్సలు పట్టించుకున్న పాపాన పోరు. నీరు మొదలు ఇతర వస్తువుల వరకు అన్ని విషయాల్లో శుభ్రతను గాలికి వదిలేస్తుంటారు తాజాగా సోషల్‌ మీడియాలో వైరల్ అవుతోన్న ఓ వీడియో చూస్తే మరోసారి పానిపూరి తినాలంటేనే గుండెలో జల్లుమనడం ఖాయంగా అనిపించకమానదు. ఇంతకీ అంతలా భయపడేలా ఆ వీడియోలో ఏముందనేగా..

ఓ వ్యక్తి పానిపూరీ విక్రయిస్తున్నాడు. అయితే అందుకోసం ఉపయోగిస్తున్న చారు దారుణంగా ఉంది. పానిపూరికి ఉపయోగించే చారులో ఏకంగా పురుగులు కదులుతూ కనిపించాయి. అంటే ఎంతటి కలుషితమైన నీటిని ఉపయోగించారో అర్థం చేసుకోవచ్చు. అలాగే పక్కనే ఉన్న డబ్బాలో చారు పూర్తిగా పాడైనట్లు కనిపిస్తోంది. దీనంతటినీ అక్కడికి వచ్చిన కస్టమర్లు గుర్తించారు.

వెంటనే వారి స్మార్ట్‌ ఫోన్‌లలో వీడియోను బంధించారు. ఈ వీడియో కాస్త సోషల్‌ మీడియాలో పోస్ట్ చేయడంతో నెట్టింట తెగ చక్కర్లు కొడుతోంది. దీంతో ఈ వీడియో చూసిన నెటిజన్లు షాక్‌ అవుతున్నారు. వామ్మో మరోసారి పానిపూరీ తినాలంటేనే భయంవేస్తుందంటూ కామెంట్స్‌ చేస్తున్నారు. నిజానికి ఇలా కలుషితమైన నీటితో చేసిన చారును తీసుకోవడం వల్లే.. కామెర్లు, టైఫాయిడ్, డయేరియా, ఫుడ్ పాయిజనింగ్ వంటి సమస్యలకు దారి తీస్తాయి. చూశారుగా ఇకపై పానిపూరీ తినేప్పుడు ఒకటికి రెండు సార్లు ఆలోచించుకోవాల్సిందే.