నటుడు సుశాంత్ సింగ్ కేసులో కీలక ట్విస్ట్..

బాలీవుడ్ నటుడు సుశాంత్ సింగ్ రాజ్ పుత్ మరణం విషయంలో ప్రస్తుతం అన్ని కోణాల్లో దర్యాప్తు కొనసాగుతోంది. అందులో భాగంగా డ్రగ్స్ కొనుగోలు వ్యవహారంపై దృష్టిసారించిన నార్కోటిక్స్ కంట్రోల్ బ్యూరో (ఎన్‌సిబి) కేసును లోతుగా పరిశీలిస్తోంది. ఇప్పటికే ఈ కేసులో ఐదుగురిని అరెస్ట్ చేసిన ఎన్‌సిబి తాజాగా.. రియా సోదరుడు షోవిక్ చక్రవర్తి , సుశాంత్ హౌస్ మేనేజర్ శామ్యూల్ మిరాండాను ఎన్‌సిబి శుక్రవారం అరెస్టు చేసింది. సుమారు ఎనిమిదిన్నర గంటలపాటు వీరిని ప్రశ్నించిన తరువాత ఎన్‌సిబి మరింత లోతుగా వారిని విచారణ చేసేందుకు అరెస్టు చేసింది. డ్రగ్ పెడ్లర్ కైజాన్ ఇబ్రహీంను కూడా ఎన్‌సిబి శుక్రవారం అరెస్టు చేసింది. రియాను కూడా త్వరలో ప్రశ్నించే అవకాశం ఉంది.

కాగా శుక్రవారం రియా చక్రవర్తి , సుశాంత్ హౌస్ మేనేజర్ శామ్యూల్ మిరాండా ఇళ్లపై దాడులు నిర్వహించారు. రెండు ఇళ్లను సుమారు రెండున్నర గంటలు శోధించారు. ఆమె సోదరుడు షోవిక్ చక్రవర్తి యొక్క డ్రగ్స్ కనెక్షన్ కేసులో రియా ఇంట్లో సాక్ష్యం దొరికినట్టు తెలుస్తోంది. ఎన్‌సీబీ ప్రత్యేక బృందాలు ఉదయం 6:30 గంటలకు ఇరువురి ఇళ్లకు చేరుకున్నాయి. డ్రగ్స్ కేసులో జైద్ విలాత్రా, అబ్దుల్ బాసిత్ పరిహార్ సహా 5 మందిని ఎన్‌సిబి ఇప్పటివరకు అరెస్ట్ చేసింది. రియా సోదరుడు షోవిక్ మిరాండాతో తనకు సంబంధం ఉందని ఒప్పుకున్నట్లు చెబుతున్నారు. గురువారం, షోవిక్ , అతని స్నేహితుడి మధ్య డ్రగ్ చాట్ వెల్లడైంది, అందులో అతను డ్రగ్ డీలర్ సంఖ్యను ఇస్తున్నట్టు చూపిస్తుంది.