Om Birla: స్పీకర్ అసంతృప్తి.. సభ్యుల ప్రవర్తన మారే వరకు సభకు హాజరుకావొద్దని నిర్ణయం..

Om Birla: లోక్‌సభ సమావేశాలు జరుగుతున్న తీరుపై స్పీకర్ ఓం బిర్లా అసహనం వ్యక్తం చేసినట్లు తెలుస్తోంది. సభలో ఎంపీల తీరుతో ఆయన అసంతృప్తిలో ఉన్నారని సమాచారం. సభ్యుల ప్రవర్తన మారే వరకు సభకు హాజరుకావొద్దని నిర్ణయం తీసుకున్నారని... ఈ నేపథ్యంలోనే ఇవాళ జరిగిన లోక్‌సభ సమావేశాలకు స్పీకర్ ఓం బిర్లా హాజరుకాలేదని తెలుస్తోంది. పార్లమెంట్ వర్షాకాల సమావేశాల ప్రారంభం నుంచి లోక్‌సభలో గందరగోళ పరిస్థితులే కనిపిస్తున్నాయి. మణిపూర్ అంశంపై ప్రధాని మాట్లాడాలంటూ విపక్ష ఎంపీలు పట్టుబడుతూ వస్తున్నారు. రోజూ నిరసనలతో సభ సజావుగా సాగకపోవడంతో.. వాయిదాల పర్వం కొనసాగుతోంది. ఈ నేపథ్యంలో ఎంపీలు సంయమనం పాటించాలని పదే పదే కోరిన స్పీకర్ ఓం బిర్లా విపక్ష ఎంపీలను మందలించారు. అయినా ఎంపీల తీరు మారకపోవడంతో ఆయన అసహనం వ్యక్తం చేస్తున్నట్లు తెలుస్తోంది.