అపెక్స్‌ కౌన్సిల్‌ సమావేశం ప్రారంభం

తెలుగు రాష్ట్రాల మధ్య జల వివాదాల పరిష్కారానికి మంగళవారం మధ్యాహ్నం అపెక్స్‌ కౌన్సిల్‌ సమావేశం ప్రారంభమైంది. కేంద్రమంత్రి గజేంద్ర సింగ్‌ షెకావత్ అధ్యక్షతన కొనసాగుతున్న ఈ సమావేశంలో ఇరు రాష్ట్రాల ముఖ్యమంత్రులు పాల్గొన్నారు. తెలంగాణ సీఎం కేసీఆర్‌ నీటిపారుదల శాఖ అధికారులతో కలిసి హైదరాబాద్‌ నుంచి, ఆంధ్రప్రదేశ్‌ ముఖ్యమంత్రి జగన్‌ దిల్లీలోని సీఎం అధికారిక నివాసం 1-జన్‌పథ్‌ నుంచి అధికారులతో కలిసి వీడియో కాన్ఫరెన్స్‌ ద్వారా కౌన్సిల్‌ సమావేశంలో పాల్గొన్నారు. కృష్ణా జలాల వివాదంపై రెండు రాష్ట్రాలు గట్టిగా వాదనలు వినిపించేందుకు సిద్ధమయ్యాయి. మరోవైపు కేంద్రం కూడా ఈ భేటీలో కొన్ని నిర్ణయాలు తీసుకోవాలనే ఆలోచనతో ఉన్నట్లు తెలిసింది. నాలుగు అంశాలను ఎజెండాగా నిర్ణయించినప్పటికీ, వీటికి అనుబంధంగా అనేక అంశాలు చర్చకు వచ్చే అవకాశం ఉంది.