Unstoppable with NBK: చంద్రబాబుకు బాలయ్య కాంట్రవర్సీ ప్రశ్నలు.. ఆసక్తి పెంచేసిన ప్రోమో

Unstoppable with NBK: బాలకృష్ణ హోస్ట్‌గా ఆహా ఓటీటీలో స్ట్రీమింగ్ అవుతోన్న అన్‌స్టాపబుల్ సీజన్‌ 4 ఎట్టకేలకు ప్రారంభమైంది. ఇప్పటికే మొదటి ఎపిసోడ్‌ షూటింగ్ పూర్తయింది. ఈసారి రెట్టించిన ఉత్సాహంతో షో ఉండనుందని ఇప్పటికే చెప్పేసిన నిర్వాహకులు అందుకు అనుగుణంగానే తొలి ఎపిసోడ్‌ను ఏపీ సీఎం చంద్రబాబు నాయుడితో నిర్వహించారు. చంద్రబాబు గెస్ట్‌గా హాజరైన ఈ ఎపిసోడ్‌ అక్టోబర్‌ 25వ తేదీ నుంచి స్ట్రీమింగ్ కానుంది.

ఇందులో భాగంగా తాజాగా ఆహా.. ఈ ఎసిసోడ్‌కు సంబంధించిన ప్రోమోను విడుదల చేసింది. కాగా ప్రస్తుతం ఈ ప్రోమో.. షోపై ఒక్కసారిగా అంచనాలు పెంచేసింది. ప్రతిపక్షంలో ఉన్న సమయంలో అన్‌స్టాపబుల్‌ షోలో పాల్గొన్న చంద్రబాబు ఇప్పుడు సీఎం హోదాలో పాల్గొనడం విశేషం. దీంతో బాలకృష్ణ ఎలాంటి ప్రశ్నలు అడగనున్నారు.? దానికి చంద్రబాబు ఎలాంటి సమాధానాలు చెప్పనున్నారన్న ఆసక్తి అందరిలోనూ పెరిగిపోయింది. అందుకు అనుగుణంగా ఈ ఎపిసోడ్‌ ఆకట్టుకునేలా ఉన్నట్లు ప్రోమో చూస్తే అర్థమవుతోంది.

'మా బావగారు.. మీ బాబు గారు’ అంటూ బాలయ్య షోను మొదలు పెట్టిన విధానం ఆకట్టుకుంది. ఇక అడిగిన ప్రతీ ప్రశ్నకు నిజాయితీతో సమాధానం చెప్పాలంటూ చంద్రబాబుతో ప్రమాణం చేయించడం విశేషం. అయితే తాను మాత్రం సమయస్ఫూర్తితో సమాధానం చెప్తానన్ని చందబ్రాబు చెప్పుకొచ్చారు. ఇక ఈ ఎపిసోడ్‌లో బాలయ్య.. రాజకీయాలకు సంబంధించి కాంట్రవర్సీ ప్రశ్నలు అడిగినట్లు స్పష్టమవుతోంది. ముఖ్యంగా వైసీపీ హయాంలో ఎదుర్కొన్న ఇబ్బందులు, అరెస్టుకు సంబంధించి ప్రశ్నలు ఉండనున్నట్లు స్పష్టమవుతోంది.

అదే విధంగా పవన్‌ కళ్యాణ్‌తో పొత్తు ఎలా కుదిరింది. జైల్లో పవన్‌ కలిసినప్పుడు ఏం మాట్లాడారు.? ఈ పొత్తు ఇలాగే కొనసాగుతుందా.? ఇలాంటి ఎన్నో కాంట్రవర్సీ ప్రశ్నలను బాలయ్య సంధిచినట్లు తెలుస్తోంది. చంద్రబాబు ఈ ప్రశ్నలకు ఎలాంటి సమాధానం ఇచ్చారన్నది ఇప్పుడు ఆసక్తికరంగా మారింది. జైలు జీవితానికి సంబంధించి ప్రశ్నలు అడిగిన సమయంలో చంద్రబాబు ఒకింత ఎమోషనల్‌కు గురైనట్లు స్పష్టమవుతోంది. అయితే గత హయాంలో తప్పు చేసిన వారినెవరినీ వదిలి పెట్టేది లేదంటూ చంద్రబాబు కాస్త సీరియస్‌గానే వార్నింగ్ ఇచ్చారు.

వీటితో పాటు ఏపీ మాజీ సీఎంకు వ్యతిరేకంగా చంద్రబాబు ఏమైనా యాక్షన్‌ ప్లాన్‌ సిద్ధం చేశారా.? అన్న ప్రశ్న కూడా బాలయ్య సంధించారని సమాచారం. ఇక జైల్లో ఉన్న సమయంలో చంద్రబాబు దినచర్య ఎలా ఉందన్న విషయాలను కూడా పంచుకున్నట్లు తెలుస్తోంది. అలాగే లోకేష్‌, పవన్‌ కళ్యాణ్‌, బాలకృష్ణ వీరి ముగ్గురిలో చంద్రబాబు అత్యంత ఇష్టమైన వ్యక్తి ఎవరన్న ప్రశ్న ఎదురైనట్లు సమాచారం. ఇలాంటి ఎన్నో కాంట్రవర్సీతోపాటు ఇంట్రెస్టింగ్ ప్రశ్నలకు చంద్రబాబు ఎలాంటి సమాధానాలు ఇచ్చారు.? ఈ ఇంటర్వ్యూ తెలుగు రాష్ట్రాల రాజకీయాల్లో ఎలాంటి ప్రకంపనలు సృష్టిస్తుందో తెలియాలంటే మరో రెండు రోజులు వేచి చూడాల్సిందే.