సినిమా ఆపేస్తే 50 కోట్లు ఇస్తామన్నారట

లక్ష్మీస్ ఎన్టీఆర్ విడుదలకు ఇంకా పట్టుమని వారం కూడా లేదు కానీ సెన్సార్ అప్ డేట్ ఇంకా వెలువడలేదు. ఒకవైపు టిడిపి సభ్యులు ఈ చిత్ర రిలీజ్ ను అడ్డుకునేందుకు ఎన్నికల కమీషన్ ను సంప్రదించి అన్నిరకాలుగా ప్రయత్నాలు చేస్తున్నారు. కానీ సినిమాల విడుదల తమ పరిధిలోని అంశం కాదని సున్నితంగా తిరస్కరించడంతో కోర్ట్ ఒక్కటే మార్గంగా నిలిచింది. ఈ విషయంలో సస్పెన్స్ వీడటానికి ఇంకో రెండు మూడు రోజులు పట్టెలా ఉంది. మరోవైపు ఓ వెబ్ ఛానల్ కు ఇచ్చిన ఇంటర్వ్యూలో నిర్మాత రాకేష్ చెప్పిన విషయాలు సంచలనాత్మకంగా మారాయి. 'లక్ష్మీస్ ఎన్టీఆర్' కనక ఆపేస్తే 50 కోట్లు ఇస్తామనే ఆఫర్ వర్మకు వచ్చిందని ఆయన పేర్కొన్నారు.

అయితే ఆయన అలా డబ్బుకు అమ్ముడుపోయే వ్యక్తి కాదని రాకేష్ వెల్లడించారు. వర్మ అప్పుల్లో ఉన్నాడని అందుకే డబ్బులు తీసుకునే ఛాన్స్ ఉందని కొందరు అంటున్నారు. దీనిపై స్పందిస్తూ అంత ఖర్మ వర్మకు పట్టలేదని క్లారిటీ ఇచ్చేశాడు. డబ్బు కోసం ఆత్మ గౌరవాన్ని అమ్ముకునే వ్యక్తి కాదు వర్మ అంటూ కితాబిచ్చాడు. మరోవైపు 'లక్ష్మిస్ ఎన్టీఆర్' 22కి వస్తుందా రాదా అనే కన్ఫ్యూజన్ ఫాన్స్ ని వదలడం లేదు. కనీసం ఆన్ లైన్ లో కూడా అడ్వాన్స్ బుకింగ్ ఎక్కడా కనపడటం లేదు. అసలు థియేటర్లు ఓకే చేసుకున్నారా లేదా అనే అనుమానాలు కూడా వ్యక్తమవుతున్నాయి.